Kuqhubekela phambili ukukhalela imuli kamuyi uGeorge H. W. Bush, owayengumongameli welizwe leMelika, obhubhe ngeviki ephelileyo.
Isidumbu sikamuyi uBush sisesigodlweni seMelika eCongress endaweni okuthiwa yiCapitol Rotunda lapho abantu abamvalelisa khona.
Kukhangelelwe ukuthi isidumbu sakhe sizasuswa kuleyo ndawo kusasa sibe sesihanjiswa eNational Cathedral lapho okukhangelelwe ukuthi kuzakuba lomthandazo wokucina uBush engakancwatshwa ngoLwesithathu eTexas A & M University lapho okwangcwatshwa khona umkakhe uBarbara Bush lomntanakhe oyinkazana.
Abantu abanengi abahambe eCapital Rotunda bathe umuyi uBush wayeyindoda elwela ilungelo labant bonke.
Omunye wabo ngumsekeli kamongameli wakwele Melika uMnu. Mike Pence.
“Akwenzayo kuzahlala kusenhlizweni zabantu. Lakho konke akwenzayo kuzakuba yinto ethakazelelwa nguzulu. Wayelomusa okumangalisayo uBush okwakubonwa ngabantu bonke abahlangana laye.”
Lokhu kusekelwe nguMnu. Paul Ryan osomlomo wedale leHouse of Representatives.
“Sonke isikhathi uMongameli Bush wayethanda unkulunkulu lokuzehlisa. Wayelendlela emangalisayo yokwenza zonke izinto azifisayo ezingafani lamuntu. Wayebusa engelakuhlukuluza abantu. Wenza kwaba lenkululeko emangalisayo kwele Melika.”
UMitch McConnell, okhokhela idale leSenate, uthe uBush waye yindoda emadodeni.
“Ngesikhathi sempi yokwethuselana njalo kubhidlika ilizwe leSoviet Union wayesikhokhela. Kwathi kufunakala ukuthi kunanzwe umthetho ePersian Gulf, wasikhokhela. Wayesikhokhela ngolwazi ayelalo.”
Abakubandla lama Democrats abagoqela uNkosikazi Nacy Pelosi, okhokhela ibandla leli kudale leHouse of Representatives, labo bancome imisebenzi kaBush.
UMongameli Donald Trump lomkakhe uNkosikazi Melannia Trump bakhangelelwe ukuthi bazabe besemthandazweni wokuvalelisa uBush kusasa eNational Cathedral eWashington DC.
