Idale leHouse of Representatives kwele Melika lithi uMongameli Donald Trump kumele athoniswe icala lokungethembeki njalo lokuvimba ukuthi kuvezwe ubufakazi edale leli ngalokhu okuthiwa wakwenza elizweni leUkraine lapho amisa khona ukuthi kuhanjiswe izikhali esenzela ukuthi kuvulwe icala likaMnu. Hunter Biden, umntaka Joe Biden, okuthiwa wenza ukungethembeki elizweni lelo esebenzela inkampani ephehla umlilo kagetsi.
UJoe Biden ukhangelelwe ukuthi uzancintisana loTrump kukhetho oluzakwenziwa ngomnyaka ozayo.
Amalunga phose wonke akubandla lama Democrats edale leHouse of Representatives avotele ukuthi uTrump ayethoniswa edale leSenate. Akula ngitsho loyedwa okubandla lama Republicans ovotele ukuthi uTrump ayethoniswa kudale leSenate abalikhokhelayo.
UNkosikazi Nancy Pelosi uthi bazaphanyeka udaba lolu edale leSenate sebesuthisekile ukuthi icala lika Trump lizathoniswa ngemfanelo.
UTrump uthi ibandla lama Democrats lenza lokhu ngoba kalithakazeleli ukuthi wanqoba uNkosikazi Hillary Clinton kukhetho olwenziwa ngomnyaka ka2016.
AmaDemocrats athi uTrump wenza okungekho emthethweni esenzela ukuthi ilizwe leUkrainne limcedise ukukhankasa ukhetho oluzakwenziwa ngomnyaka ozayo.
Ukuze sihlaziye udaba lolu sixoxe loMnu. Den Moyo, ingcwethi kwezombangazwe ezimele yodwa, othi okwenziwe libandla lama Democrats akutsho ukuthi uTrump usesusiwe esikhundleni.
