Sokuhlaselwe inkamba yebutho kwele Iraq okusebenzela ibutho lakwele Melika.
Kubikwa ukuthi ibutho leRevolutionary Guard lakwele Iran lithi yilo elihlasele ngamabhomba abizwa ngokuthi ngama ballistic missiles.
Imibiko eyethulwe ngumsakazo weVoice of America ithi akukaziwa ukuba kulamasotsha afileyo kumbe alimeleyo adabuka kwele Melika lakwele Iraq.
Ilizwe leIran liveze sobala ukuthi lizaphindisela ukubulawa komkhokheli webutho leQuds Force, uGeneral Qassem Soleimani, olensukwana ebulewe libutho leMelika.
UMongameli Donald Trump uthi ulakho ukuphindisela nxa ibutho lakwele Iran lingahlasela indawo okulabantu beMelika.
UTrump wethusele njalo esithi uzahlasela izakhiwo eziqakathekileyo kwele Iran nxa ilizwe leli lingaphindisela ukubulawa kuka Soleimani.
Inkamba le isendaweni eyaziwa kakhulu ngomvukela owamemethekiswa ngamalwecatsha aweIslamic State. Amalwecatsha la ayesexhile impande emadolobheni anjenge Fallujah leRamadi, duzane lenkamba le.
UTrump uthi kwabulawa uSoleiman ngoba kwakulemibiko ethi wayefuna ukuhlasela abantu bakwele Melika endaweni ezitshiyeneyo. Kodwa okwamanje kakethuleli idale leCongress umbiko ojulileyo ngodaba lolu.
Ibutho lakwele Melika ePentagon lithi lisahlolisisa okwenzakalayo. Kalitshongo ukuthi lizaphindisela kumbe hatshi kulokho okwenziwe ngele Iran.