Kulamakhansila eHarare athoba minwemibili, angamalunga eMDC ekhokhelwa nguMnu Morgan Tsvangirai etheswa umlandu ngamapholisa, owokukhuluma amanga ngomphathintambo obona ngokubuswa kwezabelo uMnu Ignatios Chombo losomabhizimusi olodumo uMnu Philip Chiyangwa.
Ikhansili yeHarare yethule ugwalo kumaviki asanda kwedlula isethesa uChombo loChiyangwa icala lokuzithengisela izitanda zikamanisipala ngemali ephansi bebesebezithengisela uzulu ofuna ukwakha izindlu ngemali ephezulu kakhulu.
UChiyangwa loChombo bona bathi ngamanga lokhu, ngakhoke sebemangalele amakhansila lawa. Udaba lokungethembeki kubomanisipala alukho eHarare khuphela njalo luvumbuluke kulandela ukuthathelwa intambo kwamankansila eZANU PF ngaweMDC, kodwa umpathintambo obona ngamakhansili la engoweZanu PF.
Ukuhlaziya udaba lolu uNtungamili Nkomo oweStudio 7 uxhume isiphathamandla seCombined Harare Residents Association uNkosikazi Beatrice Ngwenya lesakhamuzi sakoBulawayo uZenzele Ndebele bona abasole kakhulu okwenzakala eHarare.
