Amapholisa kwele Botswana asebopha abantu bokuza, abagoqela abadabuka eZimbabwe, abangelamaphepha aqondileyo okuhlala kulelolizwe. Kulabanye njalo abokuza asebexotshwa ngamapholisa endaweni ezinengi ezokuthengisela impahla etshiyeneyo. Lokhu kuza ngesikhathi eleBotswana likhala ngokuthi abangena elizweni okungekho emthethweni badala amacala ayesabekayo.
Amapholisa kwele Botswana, kugwalo olukhitshwe kuyonale iviki, atshelwe ukuthi ahlasele ngokudinga abokuza abangena elizweni okungekho emthethweni.
Amapholisa athi udaba lwabangena elizweni okungekho emthethweni seluhluphe ikakhulu enzikini yelizwe, iCentral District egoqela amadolobho afana leMahalapye, Palapye kanye leSerowe. IBotswana ithi iyakhathazeka ukuthi abangena elizweni okungekho emthethweni badala amacala ahlasimulisa umzimba, okufana lokubulala, basuke lapho bangene phansi njengo mswenya.
Ophathisa abeZimbabwe ukuthola amaphepha okuhlala lokusebenza kwele Botswana, uMnunzana Mthokozisi Mpofu, uthi kulez’insuku kunzima ngoba abomthetho sebeqinise ukubopha abaselizweni okungekho emthethweni.
“Iqiniso yikuthi ukuphila kweleBotswana sekunzima, sekubotshwa buthumuthumu. Sekusenza abantu bakithi baphile kabuhlungu. Lalabo abalama permit uma bengawasebenzisi kuhle sebewathathwela”
Uthi lokhu kubuhlungu ukuthi abantu bethathelwe amaphepha okusebenza uma betholakale bengasebenzi endaweni okumele basebenze khona.
“Kuba lukhuni kakhulu, uyabe ulahlekelwe yimali enkulu ngoba utholakele usebenza endaweni engayisiyo. Ngabe uhulumende uyakuhlawulisa kulokuthi akuthathele ipermit. Lokho kubuhlungu.”
Uqhubeke esithi incwadi zama work permits akuselula ukuthi ziphume, kusele kungcono kunhlangothi ezifana lezokusebenza emapulazini, abongikazi lamadokotela kanye labatshayeli bamaloli, kodwa kudingwa abalolwazi olujulileyo njalo asebeleminyaka eminengi emsebenzini.
Emzini weMogoditshane, wona oyingxenye yesigodlo iGaborone, sekusungulwe umkhankaso wokukhipha abokuza, okuthiwa bathathela izizalwane zeBotswana amabhizimusi lokuthengisa emigwaqweni.
Okumkhankaso lo njalo olungiselela ukungena kukhetho lwamalunga edale lephalamende, uMnunzana Sedirwa Kgoroba, uthi kuyamthabisa ukuthi amapholisa asesungule ukususa abokuza abathengisa emigwaqweni.
“Simele abantu, kodwa sithi, ikakhulu kwabeZimbabwe, asilwi lani, kodwa sithi noma sizwisisa isimo senu ekhaya, dingani ezinye indawo ezingasoke ziyenze lixabane labeBotswana.”
Esinye isizalwane seMogoditshane uNkosazana Ireene Setshwaelo utshele iStudio7 ukuthi kabahlaliseki ngokuthi kumele belwele indawo labo kuza, inengi lingabe Zimbabwe.
“Bayenza kuhle abomthetho uma sebeqalile ukukhipha abokuza abathengisa ezitaladeni, kade sakukhalela lokhu. Lathi sizama ukuziphilisa.”
Osesesigodlweni somele eleZimbabwe kwele Botswana, uMnu. Witness Ngwenya ukhuthaza abantu bekhaya ukuthi bethathe amaphepha abapha imvumo yokuba seBotswana.
Amadlelo awasekho luhlaza kangako kwabe Zimbabwe ababalekela isimo esinzima somnotho, besiyadinga ukuziphilisa ikakhulu emazweni afana leSouth Africa kanye leBotswana.
Lokhu kuza ngesikhathi amazwe eqinisa imithetho evikela izizalwane zazo ukuthi zingazitholi sezincintisana labokuza kumathuba emsebenzi etshiyeneyo.
Inombolo ezikhitshwa yihofisi kahulumende eyeStatistics Botswana itshengisa ukuthi inani labeZimbabwe elilamaphepha okusebenza kwele Botswana selehla lisuka kunkulungwane ezilitshumi - 10,000 ngomnyaka ka2012, layafika phose inkulungwane ezimbili - 2,000.
Forum