Bekuyisiphithiphithi kudonselanwa phakathi kwamapholisa kamanispala labaphila ngokuthengisa koBulawayo namuhla ekusungulweni kohlelo lokususa abathenga bethengisa impahla emigwaqweni ikakhulu ku5th Avenue.
Amapholisa athi asungule loluhlelo ngenhloso yokuhlanza idolobho leli eselingcole kakhulu ngenxa yabantu abenza santando bethengisela ndawana yonke.
Bakhala ezimathonsi abathengisayo besithi ukuthenga bethengisa bekubaphathisa ekondleni imuli zabo khepha bengaxotshwa bazaphila ngani. UNkosazana Ethel Muroyiwa ngosakhulayo olabantwana ababili.
“I-program yokukhitshwa kwabantu emgwaqweni leyi iyasizwisa ubuhlungu ngani ngoba thina silabantwana asilamadoda siphilisa abantwana bethu ngokuthengisa emgwaqweni khonokhu ngokuhambisa abantwana ezikolo ngakhonokho akula misebenzi. Sahamba ezikolo sibili safunda safika kubo form 6 kodwa kasisebenzi imisebenzi akula so nxa sesisuka emigwaqweni asikwazi ukuthi siphilise abantwana bethu njani. Yinto esizwisa ubuhlungu thina njengabazali."
Umfelokazi ugogo uMai Mapfumo uthi uzagcina njani abantwana engasathengisi.
"Bayasisusa eMarket asikwazi ukuthi singaphilisa njani abantwana. Abantwana bayahawula izikolo zivuliwe kulama school fees, kulama exam fees abantwana bafunda ngama phone amaphone akhona aya juswa. Lapha esihlezi khona kubhadalwa ama rent kubhadalwa amagetsi lamanzi sibona angathi sokusizimela kodwa siselizweni lakithi."
UNobhala jikelele wenhlanganiso yabathenga bethengisa abe Bulawayo Upcoming Traders Association (BUTA) unkosikazi Sthandazile Mpala yena wamukela uhlelo lokususwa kwabantu abathengisa okungekho emthethweni.
"Khathesi sesiminyene akusela order 1 iCity council ayisa benefit lutho thina sesithengisa mahara emgwaqweni wayo ende thina kuqala mina ngangile stand so ngangile change, kunengi engakwenzayo empilweni ngokuba le stand so ngibona ingani kuthwa ungaba le zitendi kuzaba le order. Ngoba nxa sinje siminyene, abanye kabatsheleki ungaze ubatshele uthi asi clean kubangumsindo abantu abafuni."
Ugogo uRose Nyathi ngomunye wabasekela lolu othi sokungcolile njalo sokulobutshapha obesabekayo koBulawayo okuyindawo eyayisaziwa ngokuhlanzeka.
“Mina sibili angali okwenziwa yi-city council ngivumelana lakho ngoba even loba nxa ungabuya eMakhethi uzobona idoti elapha eMakethi ngitsho ubani lobani awusoze uvumelane lakho. Kodwa kulabanye abangavumelani lakho abantu ngabona bayathengisa ngenkani basithathele thina izithendi thina basithola khona kuhlale lokho kungcolile, hayi mina ngithi phansi nge doti forward nge-cleanliness forward ngalokho okutshiwo yiCity Council."
Inkokheli yeZanu-PF koBulawayo ibikwa iyiyo egcwalisa abantu ukuthi bathengise okungekho emthethweni ngoba idinga abalendeli.
UKhansila ka Ward 1 emele ibandla le Zanu-PF koBulawayo uMnu Josiah Mutangi ulandule ukuthi ibandla lakhe lenza into njalo.
“Lokhu akusoqiniso, yes am coming from ZANU PF but labana kumarket bavela endawo ezitshiyeneyo. Thina njenge council sibathatha njengabantu abafuna indawo zokuthengisela kungela kuthi uvela kuyiphi ibandla."
Umsekeli kameya wako Bulawayo, uMnu. Edwin Ndlovu, uthi bafisa ukulungisela abathengisa emigwaqweni indawo ezitshiyeneyo zokuthengisela hatshi enzikini yedolobho emizameni yokumelana lokumemetheka kwemikhuhlane efana leCholera
“Lapha ku 5th avenue savumelana ukuthi sizabasusa okwesikhatshana silungise kudwetshwe imizila lapha abantu abazathengisela khona besesibisa ke bonalabo abayabe bebhalisile babuyele bathengise endaweni esilungisiwe hatshi okwenzakala khathesi, kokwenza njalo siyabe sesi cleaner ke idolobho silihlanza ke ukuthi kubeyindawo ehlanzekileyo ikanti kunqabele ukumemetheka komkhuhlane lo osuvamile elizweni.”
Ukususwa kwabantu abathenga bethengisa koBulawayo kwenzakala ngesikhathi isimo somnotho sisibanzima okwesabekayo. Kusenjalo kulabanye njalo abasuswa emadolobheni atshiyeneyo, agoqela ePlumtree, Hwange, Bindura lapho asebelaywe ukuthi bazisukele emigwaqweni bengakadudulwa ngamapholisa.
Forum