Umphathintambo obona ngezamandla omlilo otshiyeneyo uMnu. Elton Mangoma uthethwe ngamapholisa ngoLwesine ekuseni esiyambunzisisa ngecala elingakaziwa.
Abanengi banakanela ukuthi angabe ethathelwe icala lokuthi kahambisanga ngemfanelo ukuthengwa kwamafutha ezimota kunkampani ye South Africa. UMnumzana Mangoma uthethwe ewofisini yakhe eHarare wasiwa enkambeni yamapholisa ye Harare Central.
Ubikwa elokhe ekuleyo nkamba loba nje amapholisa esala ukukhuluma ngaloludaba.
Amapholisa abikwa esithi uMangoma kalandelanga iziqondiso ze Zimbabwe Tender Board ngesikhathi ekhetha inkampani ye NOOA Petroleum lonyaka yokudingela iZimbabwe amafutha edlula izigidi ezinhlanu zama liters.
Bathi inkampani le kayibhaliswanga ku Zimbabwe Tender Board ukuthi ingasebenzelana lohulumende.
Kusenjalo, idale le Supreme Court selethule isinqumo sokuthi umlawuli wedale laphalamende uMnu. Lovemore Moyo kakhethwanga ngemfanelo ngakho sokumele atshiye lesisikhundla.
Idale leli libeke eceleni isinqumo esenziwa yi High Court sokuthi ukukhethwa kuka Mnu. Moyo kwakusemthethweni.
Omele iTsholotsho edale lephalamende uMnu. Jonathan Moyo kanye lamalunga amathathu awe Movement for Democratic Change ekhokhelwa nguMnu. Welshman Ncube bahambisa loludaba emthethwandaba besithi lolukhetho lwenziwa ngendlela engafanelanga.
Ukuthi sihlaziye ukubotshwa kuka Mangoma lesinqumo sedale le Supreme Court, sixoxe lengcwethi kwezombusazwe uMnu. Themba Dlodlo lesikhulumeli sebandla le ZAPU uMnu. Methuseli Moyo abathi kababoni ibandla le MDC elikhokhelwa nguMnu. Morgan Tsvangirai litshiya uhulumende womanyano ngenxa yokuhlukuluzwa kweziphathamandla zalo ezikuhulumende.
