Amapholisa akoBulawayo ngoLwesibili abophe umeli weInsiza South edale lephalamende, uMnu Siyabonga Malandu Ncube phezu kwecala lokuthi wathelela enye intatheli igciwane leHIV.
Intathelizindaba le isebenzela iphephandaba likahulumende eleChronicle njalo ithi ingakayi emacansini loMalandu yayimsulwa. Ngalokho, ithi ayila kuthandabuza ukuthi uMalandu nguye owayithelela igciwane elibangela umkhuhlane wengculaza.
UMalandu, yena olilunga leMDC ekhokhelwa nguMnu Welshman Ncube ubehambe enkambeni yeCentral Police Station legqwetha lakhe uMnu Mlweli Ncube ngemva kokuthola imbiko ethi amapholisa ebemdinga.
UMnu Malandu uzamiswa phambi komthethwandaba ngoLwesithathu. Igqwetha lakhe kalitshongo ukuthi cala bani aletheswayo.
Engakavalelwa, uMalandu utshele lumsakazo ukuba umamangala usetshenziswa libandla leZanu PF emizameni yokumkhipha esihlalweni sakhe. Uthe uyalilandula icala aletheswayo.
Isikhulumeli seMDC kaNcube uMnu Nhlanhla Dube uthe bafuna udaba lukaMalandu luthoniswe kuhle kungaze kwangenela abezombusazwe.
