Amaphepha emthethwandaba abhalwe amacala etheswa inkokheli ye Women of Zimbabwe Arise (WOZA) abikwa engabonakali emawofisini amagqwetha kahulumende koBulawayo.
UMnumzana Kossam Ncube igqwetha lika Nkosazana Magodonga Mahlangu lo Nkosikazi Jenni Williams abasanda kuphiwa isicoco se Robert F. Kennedy Human Rights Award eMelika uthi amaphepha la abikwa evalelwe kweyinye iwofisi yamagqwetha kahulumende lapho osekuswelakale amakhiye okuvula.
UMnumzana Ncube ubikelwe yilamagqwetha ukuthi amakhiye ewofisi elamaphepha emthethwandaba ahambe lelinye igqwetha likahulumende elithethe ikhefunyana ukwenzela ukutshaywa ngumoyo emaphandleni.
UNkosazana Mahlangu lo Nkosikazi Williams betheswa amacala okutshengisela koBulawayo ekuqaliseni komnyaka lapho ababekhonona ngomumo welizwe. UMnumzana Ncube utshele uGibbs Dube we Studio 7 ukuthi kuyisimanga ukuthi lamaphepha enziwani ngakho-ke nxa engatholakalanga uNkosazana Mahlangu lo Nkosikazi Williams bazabhalela idale le High Court ukuthi amacala abawetheswayo alahlwe.
