Iqula elibona ngokhetho lokudinga inkokheli entsha kuqembu le Highlanders selilahlele khatshana amaphepha ka Enerst Maphepha Sibanda yena obefuna ukuncintisa ukuba ngumgcinisihlalo waleliqembu.
Ukungemukelwa kwamaphepha ka Enerst Maphepha Sibanda kutsho ukuba ophethe lesi sikhundla uPeter Dube ulakho ukubuyela njalo kuso ngemva kokhetho olukhangelelwe ukuba luqhutshwe ekuqaleni kwenyanga ezayo njengoba bekuyibo bobabili abakade bekhankasela leso sikhundla.
Udaba lokungaphathwa kuhle kwemali eyatholwa ngemva kokuthengiswa komdlali uObediah Tarumbwa eminyakeni eyadlulayo lapho uMaphepha okwakunguye ozibambileyo kuqembu le Bosso kanye lokuphatheka kwakhe kunsumansumane yendaba eyokuthengiswa kwemidlalo kuzwekazi le Asia ngesikhathi eyimeneja yeqembu lesizwe kukhanya kuyikho okwenze wavalelwa phandle.
Umbango ususele kulabo abafuna ukuphatha isikhundla sika nobhala jikelele weqembu kanye leselunga lekhomithi lapho okulabantu abambalwa abazancintisana loba nje okhokhela iqula elibona ngokhetho uLuke Mnkandla ethe ukhona omunye angasambethanga ngegama ngoba ebengekho laye ovalelwe phandle.
.....................................
Imidlalo yenguqu eye Africa Cup of Nations isiqale umbango we remote control ezindlini ezinengi kwele Zimbabwe loba nje iqembu elimela ilizwe lingenelisanga ukuyaphatheka kulumncintiswano oqale ngoMgqibelo odluleyo elizweni le Equatorial Guinea.
Ekusungulweni kwemidlalo ngoMgqibelo iqembu elimela ilizwe eliqoqe limidlalo ele Equatorial Guinea libe ngutshiki lobhanqa 1 ka 1 lele Congo Brazzaville kwathi komunye umdlalo wesibaya sika Group A iqembu le Burkina Faso linqotshwe nge 2 ka nya ngele Gabon.
NgeNsonto imidlalo yesibaya sika Group B egoqela obuphakathi kwe Zambia le Democratic Republic of Congo kanye lowe Tunisia edlale le Cape Verde ifike komlindi uyacina zingutshiki lobhanqa 1 ka 1.
Imidlalo iqhubekela phambili namhla lapho okudlala khona amaqembu akusibaya sika Group C njalo owakuqala uzakuba phakathi kweqembu le Ghana lele Senegal kuthi kowesibili kuzangqikilana iqembu le Algeria lele South Africa.
Kusasa ngoLwesibili kuzadlala amaqembu akusibaya sika Group D lapho iqembu le Cote d’Ivoire elizahlangana lele Guinea kuthi ele Mali lizadibana lele Cameroon.
Iqembu le Chipolopolo eleZambia kanye lele Bafana Bafana ele South Africa yiwo amele uhlangothi lwezansi yezwekazi lase Africa kulimidlalo.
............................................................
Sikhangele imidlalo yenguqu edlalwe emazweni aphetsheya ngempelansonto edluleyo;
Elizweni lase Ngilandi iqembu le Chelsea selivule isikhala semiklomelo emihlanu phezu kwengalane yemiklomelo phakathi kwalo lele Manchester City ngemva kokunqoba elikwenze ele Swansea nge 5 ka nya kwathi ele Manchester City lanqotshwa 2 ka nya ngele Arsenal.
Iqembu le Chelsea lilakho ukungezelela lelinani lemiklomelo elilehlukanisa lele Manchester City njengoba lawa maqembu ezangqikilana emdlalweni olandelayo ozakuba sekhaya leqembu le Chelsea.
Ngase Spain iqembu le Real Madrid lokhe likhokhela ele Barcelona ngomklomelo owodwa ngemva kokuba womabili lawa maqembu ephumelele emidlalweni yawo.
Iqembu le Real linqobe ele Getafe nge 3 ka nya kuthi ele Barcelona litshaye ele Deportivo la Coruna nge 4 ka nya.
Limpumela itshiye iReal Madrid ilemiklomelo engamatshumi amane lanhlanu ngemva kwemidlalo elitshumi lathoba minwe mbili kuthi ele Barcelona limiklomelo engamatshumi amane lane lidlale imidlalo elitshumi lathoba munwe munye.