Amapholisa abophe amalunga enhlanganiso ye Women of Zimbabwe Arise ayisitshiyagalolunye ngoMvulo ntambama njalo inhlanganiso le icabangela ukuthi isizatho yikukhankasela ukuthi ugwalo oluzakuba yisisekelo sombuso esitsha olwe Draft Constitution lwethulelwe abantu ngokuphangisa.
Ababotshiweyo bagoqela uVigilant Lunga, Violet Dube, Theresa Phiri, Catherine Dhliwayo, Eunice Moyo, Mpikelelo Moyo lo Sibongile Lumbile abavalelwe eWest Commonage Police Station bengakayivalelwa eBulawayo Central Police Station. Laba bantu abavunyelwanga ukudla baze badla ngoLwesibili ntambama.
Abanye ngu Miriam Ngcebetsha lo Ottilia Dube obekungazakali ukuthi bavalelwe ngaphi baza babonakala ngoLwesibili ntambama sebelabanye.
UNkosazana Magodonga Mahlangu, isiphathamandla seWOZA utshele uSithandekile Mhlanga weStudio 7 ukuthi ababotshiweyo basesitokisini seBulawayo Central Police Station njalo amapholisa lokhu edingisisa ngamalunga alinhlanganiso.
