Icele lenhlanganiso emela izisebenzi eyeZimbabwe Congress of Trade Unions (ZCTU) elikhokhelwa nguMnu Lovemore Matombo lithi lisekela inyathelo lababalisi lokukhalala umsebenzi befuna ukwengezelelwa iholo.
Intathelizindaba yethu uMark Peter Nthambe ubika ukuthi unobhala jikelele walelicele engunobhala jikelele njalo wenhlanganiso yababalisi eye Progressive Teachers Union of Zimbabwe uMnu. Raymond Majongwe usekela ngokugcweleyo inyathelo elithethwe yi PTUZ yokuthi amalunga ayo abe esiya emsebenzini kodwa engafundisi.
Kusenjalo, uNkosazana Nokuthula Hlabangana umsekeli womqondisi we PTUZ uthi banengi ababalisi endaweni ezitshiyeneyo eZimbabwe abakhalala umsebenzi loba bekhangelelwe ukuthi bazabe besiya esikolo nsukuzonke befike bengenzi lutho.
Unkosazana Hlabangana uthi ababalisi bafuna ukuthi umbalisi ohola imali ephansi athole amakhulu edlula amahlanu amadola ngenyanga.
Uthi amakhulu amabili lamatshumi amahlanu amadola abayithola okwamanje kayenelisi ukubaphilisa.
Umnu. Hlabangana uthi kababuyeli emsebenzini baze bangezelelwe iholo.
Kodwa uMnu. Sifiso Ndlovu ongumqondisi we Zimbabwe Teachers Association uthi amalunga enhlanganiso yakhe kawakhalalanga umsebenzi.
