Amalunga ebandla leMDC-T Renewal team athi ahlaselwe ngamalunga ecele le MDC-T ngempelansonto abhaxabulwa kabuhlungu. Icele le Renewal team belilomhlangano eChitungwiza lapho okuqhamuke udlakela kwalimala amanye amalunga alelicele.
Isikhulumeli se Renewal team, uMnu. Jacob Mapfume utshele iStudio Seven ukuthi kulamalunga amabili awecele le MDC-T abotshiweyo ngemva kobudlwanugdlwangu lobu. Kusenjalo icele leMDC-T belilomhlangano weNational Council lapho okugcizelelwe izinqumo ezathathwa kumhlangano we Congress owenzwa ngenyanga ka October laph okwaphiwa khona amandla uMnu. Tsvangirai onguye njalo okhethe amalunga eCabinet yangensitha, ishadow cabinet.
Abanye babakhethiweyo babalisa oMnu. Nelson Chamisa, Job SikhalaElisas Mudzuri, Gideon Shoko, Edddie Cross. Kuluhlu lolu kulabesifazane abalutshwana kakhulu. UChris Gande weStudio Seven uxoxe lengcwethi ecubungula ezombusazwe, uMnu. Rejoice Ngwenya ukuze sizwe imbono yakhe ngaloludaba.
