Umphathintambo obona ngezokulotshwa kwesisekelo sombuso kanye lendaba zephalamende uMnu. Eric Matinenga uthi kuyamdanisa ukuba amalunga edale lephalamende akalobeli ugatsha lwakhe ukuba athole imali yokuthuthukisa izabelo azimelayo.
UMatinenga uthi babili kuphela asebanelise ukuthumela incwadi zokucela limali emahofisini akhe.
Ukuhlaziya loludaba uGibbs Dube oweStudio 7 uxoxe lo Mnu. Thandeko Zinti Mnkandla omele iGwanda edale lephalamende lo Mnu. Themba Dlodlo ingcwethi ecubungula ezenotho lezombusazwe.
UMnkandla uthi imali le ibingakafakwa lugatsha lwezemali esikhwameni sephalamende ngakho-ke lokhu kwenze ukuthi bengayidingi.
Uthi uhlelo lolu luzanceda uzulu njengoba izabelo ezinengi zikhalela ingqubelaphambili.
Kodwa-ke uMnu. Dlodlo uthi limali akumelanga inikwe amalunga ephalamende ngoba alakho ukuyisebenzisa enhlelweni zokhetho.
