Amalunga edale lephalamende kwele Botswana seveze ukuthukuthela okukhulu phezu komcabango kahulumende walelolizwe owokulobelana isivumelwano lohulumende weZimbabwe esokwesula ukusetshenziswa kwama-passport yizizalwane zamazwe womabili nxa zingena emazweni la.
Athi uMongameli Mokgweetsi Masisi kazange adinge imbono kazulu phezu kwaloludaba.
Amalunga ephalamende la akubeke sobala kulelidale izolo kusihlwa ukuthi kavumelani lodaba lokwesulwa kwama-passport njalo athi uhulumende wakwele Botswana kumele aphume kusivumelwano azama ukusingena leleZimbabwe.
Udaba lolu luhlafunwe kabanzi ngesikhathi umphathintambo obona ngokungena lokuphuma kwabantu kwele Botswana, uNkosikazi Annah Mokgethi ezama ukuchasisela amalunga ephalamende ngesivumelwano lesi.
Ngeviki edluleyo esigodlweni seGaborone, uMongameli Emmerson Mnangagwa watshela umhlangano weKusi Ideas Festival, ukuthi yena usevumelene lomunye wakhe, uMongameli Masisi, ukuthi abantu beZimbabwe labeBotswana sebezangena emazweni womabili besebenzisa izithupha kuphela hatshi ugwalo lwephasiphothi.
Kodwa uMokgethi utshele idale lephalamende ukuthi abantu abazwisisi ngesivumelwano lesi.
Uthe uMnangagwa wayesitsho izifiso ezihambelana lezika Masisi, hatshi ukuthi sokulesivumelwano esesilotshelwene ngababili laba kumbe ohulumende babo.
“Ngifisa ukwethula umbiko lo ukuthi okwakhathesi akulasivumelwano phakathi kwele Botswana lele Zimbabwe ukuthi kusentshenziswe izithupha ukuchapha umngcele.”
UMokgethi uthi uma kungasungulwa lesi sivumelwano kodwa kubonakale ukuthi izinto azihambi kahle, silakho ukwesulwa.
Amalunga edale lephalamende agoqela awamabandla aphikisayo kanye labe bandla elibusayo, badle amahabula besithi okuzanywa yiBotswana leZimbabwe kumele kumiswe ngokuphangisa.
Umkhokheli wamabandla aphikisayo edale lephalamende uMnunzana Dithapelo Keorapetse ubuze ukuthi ngubani owanika uMasisi imvumo ukuthi akhulumisane loMnangagwa phezu kwaloludaba.
“Nxa kuyikuthi uMasisi uvemelane loMnangagwa kumbe leZimbabwe, uthunywe ngubani ngoba abeBotswana bayala indaba le phambi kwakhe.”
Elinye ilunga ledale lephalamende elimela idolobho leFrancistown, uMnu Wynter Mmolotsi, uthi abantu bendawo yakhe yibo abathwele nzima ngabantu beZimbabwe, njalo kungaba kubi kakhulu uma isivumelwano lesi singaphumelela.
“Liyananzelela yini ukuthi inani labantu abeZimbabwe bangacina bengena bedlule abantu abakhona eFrancistown. Lezibhedlela vele sezithwele nzima ngabo, singakaqali lesi vumelwano lesi.”
Isikhulumi sehofisi kaMongameli Masisi, uMnu. John Dipowe utshele iStudio 7 ukuthi kuzaqala kuhluzwe okutshiyeneyo kungakathathwa isinqumo ngalesisivumelwano.
Omela iZimbabwe kwele Botswana, uMnunzana Henry Mukonoweshuro, laye uthi noma nje omongameli sebavumelana, ingqobe isisezandleni zabaphathintambo kungatsha zabohulumende bamazwe womababili ukuthi baqhobe amathambo engqondo ngalesi sivumelwano.
“Okwakhathesi yisivumelwano nje phakathi kwabo mongameli bamazwe womabili. Okunengi kuzaphuma uma iziphathamandla zamazwe womabili ziqhubeka zihluzisisa okufunakalayo kulesisivumelwano.”
NgoNhlolanja lonyaka, iBotswana yasungula isivumelwano esifanayo lelizwe leNamibia, kodwa akuzange kube lokukhonona nxa zombili, inengi likwamukela lokhu ngezandla ezimhlophe.
Kodwa ngenxa yesimo esikhona eZimbabwe, eleBotswana livele lilwiswana lokungena kwenengi lizodinga amathuba emsebenzi, abanye becina bedala amacala, kulokukhathazeka ukuthi ukukhipha ukusebenzisa amaphasiphothi kungadala ingxabangxoza.
Forum