Liviki kuhlelo Liphuma Lendaba Litshona Lendaba sixoxa loMnu. Gorden Moyo owayengumphathintambo wezokuthuthukisa amabhizimusi kuhulumende womanyano esakubandla le MDC-T.
Kathesi uMoyo usekubandla le People's Democratic Party, iPDP ngemva kokusuka kubandla le MDC-T.
UMoyo uthi amafekitali avalwa kathesi ngenxa yekhefu lekhisimusi kawasoze enelise ukuvulwa ngenxa yokusilela kwemali.
"Amanengi azavalwa, vele amanengi sewavalwa. Khona vele eZimbabwe akusela fekitali sibi sibili. Kudala kwakuthiwa kukontuthu ziyathunqa akusela ngoba amafekitali sewavalwa," kutsho uMoyo.
Uthi konke lapho okwakulamafekitali kungama industry sekugcwele amasonto njalo awusoze uzwe insimbi zikhala kumbe izisebenzi ziphuma zigcwele amahovorasi. Ubona abantu bethwele amabhayibhili, kutsho uMoyo.
"I economy ngo 2016 kubi kakhulu okokuthi abantu be Zimbabwe bazangena edakeni olunye olusabekayo," kutsho uMoyo.
Ephendula ukmbuzo wokuthi kanti vele kungalungisiswa njani uMoyo uthe kumele kuguqulwe inkokheli yelizwe.
