Inkampani yamadayimani yakwele India esanda kulobelana phansi isivumelwano labosomabhizimisi beZimbabwe sokuthenga amadayimana ako Chiadzwa, ithi izakhuthaza uhulumende wakwele India ukuthi asekele lesisivumelwano emhlanganweni weKimberly Process ozakwenziwa kuyonale impelasonto e Israel.
Inkampani yakwele India ethiwa Surat Rough Diamond Sourcing India ilobelane phansi isivumelwano sokuthenga amadayimana akweleZimbabwe lenhlanganiso yabosomabhizimisi beZimbabwe abamanyene phansi kwenkampani ethiwa Zimbabwe Diamond Consortium.
Iisivumelwano lesi sithi ilizwe leZimbabwe lilakho ukuthola imali engangezigidi ezikhulu zamadollar eMelika-US$100 million ngenyanga ivela kwabe India laba.
Umgcinisihlalo wenkampani yakwele India le uMnumzana Ashitbhai Mehta uthi inkampani yakhe izab' ikhona emhlanganweni we Kimberly Process oqala kuyonale impelaviki.
UBrenda Moyo weStudio 7 ukhulume lomphathintambo wezemigodi uMnumzana Obert Mpofu othi isivumelwano lenkampani yakwele India asitsho ukuthi eleZimbabwe alisenelisi ukwenza ibhizimisi kwezamadayimani lamanye amankampani akwa manye amazwe.
