Ugatsha lwezabatsha lokuthuthukisa inotho kazulu luthi amabhanga akwamanye amazwe asebenzela eZimbabwe sokumele aqalise ukwabela uzulu amashares.
Umnu. Psychology Maziwisa omele ugatsha lolu utshele iStudio 7 ngoLwesibili ukuthi amabhanga la akhangelelwe ukwenza lokhu ngokutshetsha.
Abaqondisi bamabhanga emazweni abenze umhlangano ngoLwesibili eHarare loMnu. Saviour Kasukuwere umphathintambo wezokuthuthukisa inotho kazulu, bavumile ukuthi bazalandela iziqondiso zomthetho weIndigenization.
Uthe amabhanga anjenge Stanbic le Barclays Bank aseqalisile ukwenza inhlelo zokuthuthukisa inotho kazulu kanye lokuthengisela abantu makhaza amashares ayisilinganiso sokungamatshumi amahlanu lanye ekhulwini – 51%.
Umnu. Walter Mbongolwane ingcwethi kwezenotho ezimele yodwa uthe ukwabelana kwamashares amabhanga emazweni kuzabhidliza inotho yelizwe.
Uhlelo lweIndigenization lusungulwe nyakenye nguKasukuwere osekelwa libandla le Zanu-PF elifuna ukuthi kuthathelwe abamhlophe amankampani njengalokho okwenziwa emapulazini kusukela ngomnyaka ka2000.
