Amabandla Ezombusazwe eZimbabwe Abangisana Ukwabelana i$4 Million Dollars

Amabandla athi ele Zanu PF lele Movement for Democratic Change (MDC) ekhokhelwa nguMnumzana Morgan Tsvangirai asebangisana indlela okumele amabandla ezombusazwe abelane izigidi ezine zamadola eMelika-US$4million ebekelwe ukuphiwa lawo mabandla phansi komthetho we Political Parties (Finance) Act ku budget yomnyaka ozayo.
Ibandla le Zanu PF lithi nxa kukhangelwa inani lamalunga asedale lephalamende kanye ledale le Senate yilo okumele lithole imali enengi ukwedlula ibandla le MDC.
Umthetho we Political Parties (Finance) Act uthi amabandla ezombusazwe angena kukhetho lwephalamende lapho athola khona amavoti ayisilinaniso sokuhlanu ekhulwini-5%, phakathi kwamavoti abantu bonke kumele athole imali evela kuhulumende.
Limali yabelwana ngokuthi yiliphi ibandla elithole amavoti amanengi ekhethweni kudale le phalamende. Umthetho lo kawucaci ukuthi kumele kuhlanganiswe amadale womabili nxa sokwabelwana imali yezombusazwe njengoba ilizwe beliledale elilodwa kusukela ngesikhathi lumthetho wabunjwayo waphinda waguqulwa kancane okwesibili ngomnyaka ka 2002 langomnyaka ka 2006.
Ekhethweni luka 2008 nxa kuhlanganiswa amadale e House of Assembly le Senate, ibandla le Zanu PF lilakho ukuthola isigidi lasitshiyagalolunye lwamadola eMelika-US$1,9 million, kuthi iMDC ekhokhelwa ngu Mnumzana Tsvangirai ithole isigidi latshiyangalombili -US$1,8 million, kuthi-ke ibandla le MDC elikhokhelwa nguMnumzana Arthur Mutambara linikwe inkulungwane ezingamakhulu edlula kancane amathathu -US$312 000.
Ibandla le Zanu PF lithi lona kumele lithole imali enengi ukwedlula ibandla le MDC elinqobe kukhetho lwedale le phalamende njalo libe lilamalunga amanengi kusanda kwenziwa ukhetho ngomnyaka ka 2008.
Kodwa-ke uNkosazana Thabitha Khumalo umsekeli wesikhulumeli sebandla le MDC ekhokhelwa nguMnumzana Tsvangirai utshele uGibbs Dube owe Studio 7 ukuthi kumele amabandla wonke alamalunga ephalamede ahlale phansi akhulume ngokuthi idale le Senate lizakhangelwa na, nxa sokwabelanwa limali.