Njengemvama, abameli bamabandla akuhulumende womanyano abahlangane labameli bakaMongameli Jacob Zuma kweleSouth Africa ngempelaviki behlulekile ukuvumelana entweni ezibalulekileyo ngaphambilini komhlangano weSadc oqala ngoLwesithathu kweleAngola.
Abaphathintambo ababona ngendaba zaphandle kwamazwe eSadc yibo abazavula umhlangano lo eLuanda ngoLwesibili, kuthi abakhokheli bamazwe bona bazahlangana ngoLwesithathu behluza okutshiyeneyo okugoqela udaba lweZimbabwe.
Abameli beZanu PF babikwa betshele iqula likaMongameli Zuma leli ukuba kabasoze bavume ukuthi kuguqulwe indlela abezomvikela abasebenza ngayo kanye lokuthi kukhethwe amalunga eZimbabwe Electoral Commission (ZEC) amatsha.
Konke lokhu lokunye okungakalungisiswa, kukhangelelwe ukuhluzwa yinkokheli yeSadc ngoLwesithathu.
Kodwa isikhulumeli seZanu PF uMnu Rugare Gumbo utshele iStudio 7 ukuthi ibandla lakhe alisoze livume kukho konke okufunwa ngamacele womabili eMDC.
