Ibandla le MDC elikhokhelwa nguMnumzana Morgan Tsvangirai lithi inkulumo zokulungisisa okuhluphayo kusivumelwano sokumanyanisa i-Zanu PF leMDC zikhanya sezehlule, lisithi isisombululo kungaba lukhetho olutsha.
Ekhuluma emhlanganweni awenze lentathelizindaba ngoLwesihlanu eHarare, uMnu Nelson Chamisa oyisikhulumei sebandla leli wazise ukuthi ibandla lakhe libona kungela nguquko lengqubelaphambili kunkulumo esezilesikhathi eside ziqhutshwa.
Ngalokhu, uChamisa uthe ibandla lakhe selikhangelele kumanyano weSadc kanye lakumlamulankunzi uMongameli Jacob Zuma weSouth Africa ukuthi bangenele ngamandla baxazulule ingxaki ekhona. Nxa kusehlula lokhu, kutsho uChamisa, ibandla lakhe lifuna kuyiwe ukhetho olutsha.
Emhlanganweni lo, ibandla leli liphinde lazisa ngenhlolisiso elisanda kuyenza phezu kodaba lobudlwangudlwangu lokufumbathisana osokubhahile kukhansili yedolobho leChitungwiza.
Umsekeli kanobhala jikelele webandla leli uMnumzana Tapiwa Mashakada uthe iMDC simise amakhansila edolobho leli wonke ukuba ngamalunga ayo ngemva kokubana ukuphendla ekwenzileyo kuveze ukuthi aphatheka emisebenzini yokungethembeki encedisana leziphathamandla zeZanu PF.
