Osomabhizimusi bako Bulawayo abehluleka ukuthola imali yokuvuselela amafekithali abo bathi bavumelana losibalukhulu we Reserve Bank of Zimbabwe uMnu. Gideon Gono othi sokumele bathwalise nzima ingatsha zikahulumende. Lezi ngatsha zethule nyakenye uhlelo lokuthi osomabhizimusi bathole imali yokuvuselela amankampani adilikayo kodwa lalamhla lokhu alukhanyi ukuthi kuyiwaphi njalo luqhutshwa njani.
Osomabhizimusi laba bathi mathathu amabhizimusi akoBulawayo asenile ukuthola imali kuhlelo lolu olwanikwa izigidi ezingamatshumi amabili amadollar eMelika nguhulumende kwathi-ke lenkampani ye Old Mutual Insurance yafaka imali efanayo.
Bathi akuqedakali ukuthi kwenzakalani ebhanga le Cabs elinika osomabhizimusi imali le.
UGono utshele osomabhizimusi laba ngoLwesine ukuthi kumele baqoqe uzulu ukuthi atshengisele ezitaladini njalo ayehlala emawofisini eziphathamandla zikahulumende ezigoqela uMnu. Tendai Biti obona ngezemali loMnu. Welshman Ncube okhangelane lezamafekithali.
IStudio 7 kayenelisanga ukukhuluma lo Mnu. Biti kanye lo Mnu. Ncube ngodaba lolu.
UBiti wethule umbiko ngoLwesithathu othi malutshwane amankampani acele uncedo kuhlelo lolu kusukela ngoMfumfu nyakenye.
Uthe iCabs isinike amankampani phose izigidi ezimbili zamadollar eMelika yokuvuselela amafekithali elizweni lonke jikelele.
Katshongo ukuthi mangaki akoBulawayo athola imali le njengoba imali eyacelwa ngamankampani isedlula kancane izigidi ezilitshumi lesithupha amadollar eMelika kuphela.
Umnu. Bulisani Ncube umqondisi we Zimbabwe National Chamber of Commerce edolobheni lakoBulawayo uthi osomabhizimusi sebekhathele ngokwenzakala ngemali le ebizwa ngokuthi yi Distressed and Marginalised Areas Fund
Akuthwaliswe Nzima Uhulumende Ngohlelo Lokuvuselela Amafekithali KoBulawayo Olungaqedakaliyo
- Gibbs Dube
