Uhulumende weBotswana uthi uzaqhubeka ngemizamo yokuthi athuthukise impilakahle yeziphepheli, abanye, bengabavela eZimbabwe.
Kukhangelelwe ukuthi ezinye iziphepheli zihanjiswe kwamanye amazwe aphetshaya kulandela isicelo sabo.
Umphathintambo obona ngeziphepheli kwele Botswana, uMnunzana Machana Shamukuni ekhuluma ngelanga lokunanza iziphepheli enkambeni yeDukwi ngoLwesine, uthe uhulumende wakhe wenza konke okusemandleni ukuguqula imthetho ezakwenza impilakahle yeziphepheli ibengcono.
Iziphepheli zihlala zikhonona njalo nje ngokungatholi ukudla okweneleyo kumbe okonakeleyo kanye lokuhlala ezindlini okungamelanga kuhlale abantu.
UShamukuni uthe konke lokhu kuzalungiswa ngokuguqula eminye imthetho ukuze ihambelane leyenhlanganiso yomanyano womhlaba eyeUnited Nations.
“Sizimisele ukuthi sizakhangela imthetho ehambelana leziphepheli, okuzabona bephiwa izithupha, lokunye njalo sesihambe isibanga ukuthi sikwenze lokhu. ”
UShamukuni uthe kulenani leziphepheli eliphose lifike amakhulu amathathu - 289 elizakuyahlala kwamanye amazwe kulandela isicelo sazo. Lokhu kugoqela abanye abeZimbabwe abazahanjiswa emazweni afana leCanada.
"Ngiyabongela uhlelo lokuhambisa abanye benu kwamanye amazwe. Kulaba ngu 289 okumele bahambe. Silethemba lokuthi ngenyanga ezayo konke kuzabe sekulungile.”
Owenhlanganiso ebona ngeziphepheli umhlaba wonke jikelele, eyeUN High Commission for Refugees, uMnunzana Madoda Nasha, utshele iStudio 7 ukuthi njenge ndlela yokuthuthukisa impilo yeziphepheli, sebezaqala ukubanikeza imali ukuze bazithengele ukudla.
“Sikhangele ukuthi uhlelo lolu lokuthi baphiwe imali hatshi ukudla, lusungule ngenyanga ezayo. Amalungiselelo wonke nje aseqalile.”
Nomanje kulemizamo yokuthuthukisa impilakahle yeziphepheli inhlanganiso emela amalungelo oluntu kwele Botswana eyeDitshwanelo ithi kayijabuli ngesimo esikhona enkambeni yeDukwi.
Isikhulumi seDitshwanelo uNkosazana Galeboe Moreeng uthi uhulumende w Botswana kumele azame ukuthuthukisa impilakahle yeziphepheli kweleBotswana
“Sikhuthaza uhulumende wethu ukuthi akhangelisise imthetho yeziphepheli ukuthi labo bazizwe beyamukelekile kweleBotswana.”
Ukuncipha kwemali yokungcina iziphepheli enkambeni yeDukwi kwenza ukuba abanye beyedinga imisebenzi yokuziphilisa.
Inengi leziphepheli zeZimbabwe eziseDukwi zabaleka ekhaya ngesikhathi sokhetho lokudinga umongameli lona olwalulodlakela ngomnyaka ka 2008,
Bekuleziphepheli ezidabuka eZimbabwe ezidlula amakhulu ayisikhombisa eDukwi, kodwa sekusele ingcosana inengi selabuyiselwa ekhaya, kuthiwa isimo sesilungile ukuthi baphindele.
Forum