Kulabadabuka eZimbabwe abahlala kwele Botswana abathi kabakholwa ukuba uMongameli Emmerson Mnangagwa uzasuka embusweni kungakenziwa ukhetho ngomnyaka ka2028, loba esebikele uzulu ukuthi usefuna ukuphumula.
Omunye wabathandabuza okwethulwe nguMnangagwa ngeviki ephelileyo eseMutare Teachers College, nguMnumzana Mkhululi Moyo ohlala eGaborone.
“Abantu bezombusazwe bayantshintsha. Umongameli laye ngumuntu wezombusazwe ngakho sizakubona uma sekusenzakala ngoba abantu bezombusazwe ngabantu bezithembiso. Ungeke wathemba ngaphandle kokuthi ubone sekusenzeka.”
UMnunzana Andreas Sibanda esinye isizalwane seZimbabwe esihlala edolobheni leli laye uthi akuqedakali okukhulunywa nguMnangagwa.
“Umongameli kade elokhe ekhona ngesikhathi sikaRobert Mugabe. Umthetho siyawubona kodwa asingeke sibekwazi izifiso zomuntu, esizakwenza yikuthi sizalinda sibone.”
Kodwa bakhona abakuhulumende kanye labaphikisayo abathi uMnangagwa ukhuluma iqiniso njalo uzasuka esikhundleni sikamongameli. Umabhalani jikelele webandla eliphikisayo eleBotswana Patriotic Front, uMnumnzana Lawrence Ookeditse, uthi ngokubona kwakhe, uMnangagwa uzasuka embusweni.
“Linyathela elihle kulizwe leZimbabwe. Mina ngibona uzakwehlika esihlalweni. Izikhathi ziyantshintsha njalo angiboni elesifiso sokuphuma njengo Mugabe. Kafuni ukucina ekhitshwa. Kala ngeyinye indlela.”
Ocubungula ezombusazwe ekwele United Kingdom, uMnumzana Zenzo Moyo, uthi inyathela likaMnangagwa lingabe liyindlela yokulinganisa ukuthi uzulu uzakuthini.
“Okukaqala bengabe bezama ukuzwa ukuthi uzulu uthini. Bengajika kusasa bethi uzulu ufuna umuntu aqhubeke ngoba kuyikho okufunwa ngabantu.”
UMoyo uthi kungenzeka njalo ukuthi ibandla leZANU PF liyabona ukuthi amabandla aphikisayo ayaxega okwamanje yikho bezama ukulungisa umuzi wabo.
“Yiso isikhathi sokuthi bentshintshe inkokheli bengesabi lutho ukuthi amabandla aphikisayo angabayenzani. Bayabe belesiqiniseko sokuthi noma kutheni, bazanqoba.”
Isimemezelo sikaMnangagwa sabuya ngesikhathi kulokungahlaliseki ngenxa yemizamo phakathi kwebandla lakhe leZANU PF ukuthi kwesulwe imigoqo yesikhathi sokuhlala ewofisini kamongameli weZimbabwe. Sekudume islogan esithi 2030 uMnangagwa uzabe ekhona. Kodwa kukhanya kulabanye kubandla leli abakuphikisayo lokhu.
Forum