Abantu abanengi eZimbabwe bathi akubamangalisi okwenziwa nguNkosikazi Grace Mugabe, ekuvezeni amandla akhe bethi ngoba ubevele elawo lasekuqaleni kodwa engawasebenzisi mgceke njengalokho asekwenza manje.
Unkosikazi Grace usebonakala edlalela ezikhundleni zaphezulu, esekuveza mgceke ukuba ulamandla amakhulu.
Ubufakazi bokuba ubevele ewasebenzisa ngasese lawamandla, unkosikazi Mugabe, yinkulumo yakhe yokuba waba lesandla ekubekweni kowake waba ngumsekeli kamongameli, unkosikazi Joice Mujuru endaweni kamnumzana Emmerson Munangagwa osengumsekeli kamongameli okwamanje lanxa kunguye awayekhethwe yinkokheli yeZanu PF ezigabeni eziyisitshiyagalombili ngomnyaka ka 2004, ibandla lifuna umsekeli kamongameli owesifazana.
Umgcinisihlalo enhlanganisweni esebenzelana lozulu eye Combined Harare Residents Association – CHRA, umnumzana SImbarashe Moyo, uthi kulusizi ukuba uzulu khona ekunanzelela khathesi ukwenza kukankosikazi Mugabe, obevele ekwenza lokho kusukela selokhe waba ngumka Mongameli.
Osekusethusa abanengi uMoyo uthi yikusabalala kwalawo mandla esengenela lemisebenzini kahulumende, esazi ukuba akenziwa lutho njengoba engumkakhe kamongameli.
Obona ngezokuqhutshwa komsebenzi ebandleni lezombusazwe le People’s Democratic Union – PDU, umnumzana Sambulelwe Tshabangu uthi isibonelo samandla kamkamongameli, yindlela asebenzisa ngayo impahla kahulumende kulezi nsuku, kikho konke akwenzayo okuyinto athi kumele imethuse uzulu.
Isibindi sikaNkosikazi Mugabe sivezwa layindlela akhulumisana lozulu, engakhethi magama loba ukuhlonipha abadala kulaye, ekwenza ngoba esazi mhlophe ukuba akula ozawuvula umlomo empikisa nxa umkakhe esaphila njalo engumongameli kuveza u Tshabangu.
Wengeza u Tshabangu ethi uyayazi mhlophe into ayenzayo unkosikazi Mugabe, elisebenzisa ngebanga eliphezulu ithuba lokuba kwakhe ngumka mongameli,eqhuba okuqondene laye lomndeni wakhe hatshi ukusebenzela uzulu.
Umnumzana Theophelus Thembo wase Greystone Park laye uthi akumangalisi okwenziwa ngumka mongameli, kuyisibonelo somuntu osewethukile ukuba usetshonelwe lilanga, engakayilungiseleli imhuli yakhe, esenanzelele ukuba usekhulile ngempela umkakhe, kungasensuku zatshwala ezawatshiya amabele.
Uzulu akangakhangeli ukuba ungene njani kwezombusazwe ngoba kungaqakathekanga lokho, okuqakathekileyo kuyikuba ungena khathesi nje efuqwa yini lokuba ehloseni kuveza uThembo.
Enye yengcwethi kwezombusazwe umnumzana Pride Mukono uthi makungabi yinto emangalisa uzulu ukungena kukankosikazi Mugabe kwezombusazwe ngoba kungelinye lamaqhinga kamongameli Robert Mugabe ukuba abe lokhe ebambelele embusweni, esesebenzisa umkakhe, njengalokho abekwenza labohlangothi lwezomvikela.
Ukwenza kwakhe unkosikazi Grace Mugabe uzulu uthi, kwehlukile kulokho okwakusenziwa ngumuyi unkosikazi Sally Mugabe, ochazwa njengomuntu obesazi isibanga sakhe njengomama wesizwe, elokukhalipha okuthize esazi njalo lapho kumele aphelele khona okwenza wathandwa ngabanengi lalapho esengasekho emhlabeni.
