Umphathintambo obona ngokuthuthukiswa kwabensundu kwezenotho uthi uMongameli Mugabe ngumuntu ofundileyo kakhulu oledegree kwezenotho njalo akulamuntu ongamtshela lutho ngokuvuselela umnotho welizwe.
“UMugabe uleMaster’s degree kwezenotho ayithola esikolo seLondon School of Economics. Ngakho, lingacabangi ukuthi kukhona elingasifundisa khona,” kutsho uMnu Patrick Zhuwawo ngoLwesihlanu.
UZhuwao, ongumzukulu kaMugabe, wethule amazwi la lanxa nje umnotho weZimbabwe uqhubeka ubhidlika ngamandla lozulu laye elahlekelwa yimisebenzi.
Uthe uhulumende uyaqhubekela ngohlelo lokuthuthukisa abensundu lanxa bekhona abalusolayo loluhlelo abagoqela iziphathamandla zikahulumende besithi kumele luguqulwe.
Ingcwethi kwezenotho uMnu Masimba Kuchera uthe amazwi kaZhuwawo ayahlekisa ngoba umnotho weZimbabwe uqhubeka usiwa ngamandla njalo uMugabe ekhanya engazi ukuthi awuvuselela njani.
Kunjalo nje ibandla lezanu PF lithi umhlangano walo weAnnual Conference uzakwenzelwa eVictoria Falls kuqala mhlaka 7 ngoMpalakazi kusiyafika umhlaka13 ngenyanga efanayo.