Sokulungiselelwa ukuvulwa kwesikolo esitsha iUnited States Achievers’ Program (USAP) Community School eHarare esizakuba labantwana abenza izifundo zeLower Sixth kusukela ngoZibandlela ngomnyaka ozayo.
UNkosikazi Rebecca Mano, obona ngenhlelo ezitshiyeneyo esikolo lesi esizimele sodwa, uthi abantwana abakhaliphileyo abangenelisi ukuhlawula imali yezifundo, bazancediswa ukuba bafunde eUSAP Community School.
Abenze kahle balakho ukuqhubekela phambili ngezifundo zabo emakolotshini kwele Melika lapho abazathola khona uncedo lokuhlawulela imfundo yabo. Kuzafundiswa izifundo zama sciences kanye leSilungu esijulileyo.
Okwamanje kulungiselelwa ukuthi abafisa ukungena kuhlelo lolu bathole ama-application forms endaweni ezitshiyeneyo okulenhlelo zeMelika emadolobheni.
Kumele ama-application wonke atholwe ngabawahlolisisayo eHarare kungakafiki umhlaka 20 Mfumfu.
UNkosazana Charmaine Nyakonda, ozabe efundisa esikolo lesi, uthi abafisa ukuthola okunengi ngodaba lolu kumele baxhumane laye ngokutshetsha.
Kusukela ngomnyaka ka1999 sokufundiswe abantwana abedlula amakhulu amane kwele Melika ngaphansi kohlelo lolu.
Abanye bacina besenza izifundo eziphezulu ezinjengama PhDs.
