Amapholisa labebutho bebevimbe imigwaqo yonke engena edolobheni leGwanda kuthi labo abakade begade amabhasi kaZupco labo bebeyehliswa kumele bakhiphe ubufakazi obuqinileyo bokufuna ukungena phakathi kwedolobho.
Abezomvikela bebebhodabhoda njalo phakathi kwedolobho lemalokitshini ngenyawo langezimota besithi uzulu ehlale ezindlini.
UMnu Ndaniso Mpande ngomunye ohlala phakathi kwedolobho leGwanda njalo uthi umumo ubungafani lensukwini.
"Lamhlanje kulomahluko omkhulu kakhulu sibili lapha edolobheni akulabantu abahambayo, umuntu umbona gqo lezimota lazo uzibona gqo ngitsho lamabhizimusi amanengi avaliwe abantu abasebenzi lamuhla bazihlalele ezindlini kuthule kutshaya umoya."
Osakhulayo uMnu Graidom Phiri olilunga lebandla eliphikisayo eleMDC Alliance uthi okwenziwa ngabezomvikela yikuphela amalungelo oluntu akusisekelo sombuso.
"Njengebandla sinanzelela ukuthi isisekelo sombuso asilandelwa njalo amalungelo ethu awahlonitshwa njengebandla sithi thina asivumelani lento enjalo abantu kufuze bayenze amalungelo abo bayenze ama rights abo njengabantu amaZimbabweans lokhu esikubonayo siyahlukumezwa siyakhahlamezwa."
Kodwa uMnu Malaki Nkomo owebandla leZanu PF uthi ukuthula okubekhona lamhlanje kuveza obala ukuthi uhulumende obusayo ukhethwe ngabantu.
"Abantu bakhathele ukuthi babebetshelwa ukuthi ngenani ezitaladeni kungelanto abazayiyenza njalo nje bayakwazi ukuthi uhulumende ungena ngoba evotelwe , isikhathi sama elections sikhona uma kufanele ukuthi uhulumende abantu bamkhuphe ukhitshwa nga elections hatshi lokhu esikwazwayo ukuthi ngenani ezitaladeni, ayisikho."
UMkhokheli webandla eliphikisayo eleTransform Zimbabwe uMnu Jacob Ngarivhume lonozindaba uHopewell Chin'ono babotshwa besetheswa icala lokutshotshozela udlakela ngokukhuthaza uzulu ukuthi atshengisele ezitaladeni lamhlanje esola umbuso weZanu PF abathi subulele ilizwe ngenkohlakalo.
