Uhlangothi olubuthanisa imali kahulumende olweZIMRA luthi isimo somnotho eZimbabwe esingamanga kuhle sidale izikhubeko ekubuthaniseni imali esigabeni sakuqala salonyaka nxa kuqathaniswa lemali etholakale esigabeni esifanayo nyakenye.
Embikweni wayo wenyanga eziyisithupha zakuqala zalonyaka i-ZIMRA ithi ibuthanise amadollar edlula ibillion lengxenye-$1.65billion okuyimali ehle ngesilinganiso sokuyitshiyagalolunye ekhulwini- 9.31% kuleyanyakenye. Kubangelwa yikungaqubi kakuhle komnotho isithi sokudingakala ukuvuselela umnotho ngokusekela imisebenzi yezokulima.
Ocubungula ezombusazwe umnumzana Masimba Kuchera uthi I ZIMRA isizama ukukhumbuza uhulumende ukuba ethathe amanyathelo kuloludaba.
Emalini yemithelo yabantu makhaza iZIMRA ithi kube lokwehla ngesilinganiso sokuyisithupha ekhulwini- 6.26% kuqathaniswa lebuthaniswe ngesikhathi esifanayo nyakenye kubangelwa yikulahlekelwa umsebenzi kwabantu lokwehliselwa kwabo iholo isithi ukuvuselelwa kwezokulima kungavula imisebenzi emitsha.
Ocubungula ezomnotho umnumzana Rejoice Ngwenya uthi umsebenzi onje ngokahulumende:
Umsekeli kamongameli umnumzana Emmerson Mnangagwa wazise kunsukwana ezisanda kwedlula ukuba uhulumende sesebenzisa indlela ye Command Agriculture njalo ekhangelele ukuthola isivuno esengcono esikhangelelwe ukwenela uzulu weZimbabwe, kuphinde kusale omunye umumbu ngaphezulu ongagcinwa eziphaleni.
UNgwenya kodwa ethi lokhu kungaphathisa uzulu okwesikhatshana ngoba kungasimsebenzi ka hulumende wokulima umele wenziwe ngabantu makhaza labalimi abalolwazi.
I ZIMRA ithi okumangalisayo yikuthi liyanda inani labantu abakhanya bephila impilo ephezulu besakha izindlu ezimangalisayo behamba langezimota zakulezinsuku yona imithelo isehla kangaka bethi amabhizimusi amakhulu alezikwelede labo ezifika kuzigidi ezedlula amakhulu ayisikhombisa zamadollar-$750.16 million bethi kuqakathekile ukuba ilizwe lilwisane lomkhuba wokufumbathisana kulokukhuluma ngakho kokuphela kungela nyathelo elithathwayo.
Uhulumende usolwa ngokungalaleli amacebo anje okucina kuphazamisa intuthuko yomnotho elizweni.
