Inhlanganiso eye Zimbabwe Diabetes Association isinxuse abantu abalomkhuhlane wetshukela ukuba babhalise ngaphansi kwenhlanganiso le, ukuze benelise ukufinyelela ukuthola imithi kungela mbhadalo.
Inhlanganiso le, isungule lolu hlelo isebenzisana leye Life For a Child ekuphathiseni abantu abaphila lomkhuhlane oweDiabetes, ikakhulu abasakhulayo, abantwana abaphuma emulini eziswelayo ukuthi bathole imithi kungela nhlawulo.
Umnumzana Tinashe Meza ofundisa ngomkhuhlane wetshukela emele inhlanganiso eye Zimbabwe Diabetes Association uchasisa ngohlelo abaluqhubayo.
“Okokuqala, kumele umuntu avakatshele amawofisi aweZimbabwe Diabetes Association agcwele ilizwe lonke. Okudingakalayo ngamabhuku esibhedlela, umfanekiso womuntu obhalisayo, lemali engange $5 eyemelika kumbe elinganayo nge yeZimbabwe. Loluhlelo soluphathise intsha eleminyaka engamatshumi amabili lanhlanu kilusiyaphansi kusukela ngomnyaka ka2009. Khathesi izinkulungwane ezinengi sezisanelisa ukuthola imithi yomkhuhlane wetshukela, ngenye indlela sokwehlise umthwalo okhangelane labagula lumkhuhlane. Ukwelapha lumkhuhlane akula khefu ngakho akufanelanga umuntu eqise ukuthatha imithi yakhona.”
Uqhubekela phambili umnumzana Meza ekhuthaza abantu abalomkhuhlane wetshukela ukuba babhalise kunhlanganiso yabo ukuze bathole usizo.
Khathesi uhlelo lolu selugoqela bonke abagula umkhuhlane wetshukela kengelani leminyaka yabo ngaphansi kweZimbabwe Diabetics Association. Uhlelo lolu selugoqela abalomkhuhlane wohlobo lwesibili(Type 2 Diabetes), lapho abathola khona imithi eyelapha lumhlobo wetshukela kunye lemithi yeBlood Pressure. Sithi thina, wonkumuntu ophila lomkhuhlane wetshukela ulakho njalo kumele abhalise ukuba yingxenye njalo kumalunga ethu, siyakhuthaza ukuthi bahlale bekhulumisana lathi ukuze sazi ukuthi benelisa njani ukuphila lawo lumkhuhlane.”
Unkosikazi Anita Thebe umzali olomtwana ophila lomkhuhlane wetshukela uchaza ahlangana lakho.
“Umtanami uphila lomkhuhlane we Diabetes, uhlupho engihlangana lalo yikuthi imedication yakhe iyadula. Kumele ahlabe kabili ngelanga, ngenyanga ngisebenzisa imali eyedlula US$25. Ngapha okunye kumele ngikhangelisise i diet yakhe so imali ezicina zidingakala zisuka zingikhame. Ngakho nxa kulohlelo lokuthi sithole imithi mahala, balamulele thina kakhulu siyabonga.”
Umnumzana Njabulo Gumbo umhlali wakoBulawayo ophila lomkhuhlane wetshukela ukhala ngendleko yemithi okumele ayithathe.
“Into nje engani iyangi disturber ngumuthi lo owokuhlaba, uyadula kakhulu. Okunye okungani kuyangihlupha yikuthi sengi gainer kakhulu umzimba angisakwazi ukuthi yindaba. Kodwa emzimbeni ngizizwa ngi right kakhulu, ngiphila kahle angizange lutho.”
Ngomnyaka ka 2017 ugatsha lwezempilakahle lwakhipha umbiko wokuba kulabantu abayisigidi lengxenye abaphila lomkhuhlane wetshukela owe Diabetes elizweni lonke jikelele.
Isilinganiso sokumemetheka komkhuhlane lo ebantwini abadala sinye ekhulwini (1,2%). Kuthi ebantwini abalikhulu(100) kucatshangelwa ukuthi abalitshumi babo baleDiabetes.
