Abenhlanganiso yeZimbabwe Community in South Africa sebesungule uhlelo oluzasiza izizalwane zeZimbabwe lezakweleSouth Africa ukusungula amabhizimusi ndawonye lokwabelana amacebo emisebenzi. Intatheli zindaba uThuso Khumalo usipha loludaba eseJohannesburg kweleSouth Africa.
Kuhlelo olusungulwe edolobheni leJohannesburg, abenhlanganiso le, bathi bazabhalisa izizalwane zeZimbawe ezikumabhizimusi enhlangothi ezitshiyeneyo zempilo. Ngemva kwalokho izaqoqa imihlangano yokufundisana lokuphana amacebo emalokitshini akweleSouth Africa lapho abeZimbabwe laba abazafundisa khona abekweleSouth Africa lezi nhlelo zamabhizimusi.
Isikhulumeli senhlanganiso yeZimbabwe Community in South Africa umnumnzana Bongani Mkhwananzi uthi labakweleSouth Africa labo abalenhlelo zamabhizimusi bazakwenza okufanayo, kwabelwane ulwazi lamacebo kungela mbadalo njengoba lezi nhlelo zikhangelelwe ukuthi zithole uxhaso lwemali kumabhizimusi atshiyeneyo.
“Izikili lezo sifuna zibheke ingqubela phambili yakusasa. Ngoba kukhulunywa manje ngabo fourth industrial revolution. Sifuna ukukhangela ukuthi izikili lezi ezizophiwa abantu ngezizoncediswa yi programme leyi, Iyabrija igap yezikili esezisifa manje ngoba zinengi izikili esezisifa kodwa sekuvuleka ezinye. Sifuna kuye ngalolohlangothi”.
Laboke abathanda ukufunda labo bazakwenzelwa izifundo zemisebenzi ebulenjini beinternet lapho abazancediswa khona baze bafunde kungelambadalo
Umnumnzana Mkhwananzi uthi labo abalenhlelo ezintsha zokusungula amabhizimusi agoqela izizalwane zeZimbabwe lezakweleSouth Africa bazathola uxhaso oluvela kubosomabhizimusi.
“Lokho sicabanga ukuthi kuzakwehlisa ukuqubuka kodlame lokungezwani kubangwa yingcosana yamaresources lawa akhona. But ma abantu sebeqeqetshekile bendawonye balengqondo efanayo. Lezi zinto ziyabenza ukuthi bathuthuke. Kakhulu sihlose yona ihost community, izakhamizi zala ukuthi hayi wozani sisebenzisane, siqeqetshane.”
Isiphathamandla sehofisi yeZimbabwe Consulate eJohannesburg uNkosikazi Melody Chaurura laye obekhona kusungulwa loluhlelo, ngomunye wabemukele loluhlelo ngezandlla zombili.
"Njenge embassy leConsulate siyathembisa ukuthi sizalixhasa kukho konke elikwenzayo ukuthuthukisa impilo yezizalwane zeZimbabwe.“
Umsekeli kanobhalala jikelele ebandleni elibusayo kweleSouth Africa eleAfrican National Congress unkosikazi Jessie Duarte laye obekhona kusungulwa loluhlelo uthe kuqakathekile ukuthi abeZimbabwe lezizalwane zakweleSouth Africa badinge indlela abangasizana ngazo hatshi abangazondana ngazo.
"Liqiniso elingaphikekiyo ukuthi kufanele sihlalisane ngoba abavela kwamanye amazwe bazahlala bekhona.“
Kusenjalo osomabhizimusi abayizizalwane zeZimbabwe, esezihlala kwele South Africa abakade bekhona, emkhosini wokusungulwa kwaloluhlelo bathembise ukufaka esikhwameli saloluhlelo amarandi edlula izinkulungwane ezilikhulu (R140,000).
