AbeZimbabwe bathi bemukela ngokuthokoza inyathelo likaMongameli Duma Boko oweBotswana omutsha, othi uzalungisela abeZimbabwe amaphepha abanikeza ilungelo lokuhlala kulelolizwe esithi lokhu kuzaphathisa ukuthuthukisa umnotho, ukwazi ukuthi bakuphi ngasosonke isikhathi njalo bekwazi ukuhlawula umthelo we-tax.
Kodwa abanye abeBotswana abajabuli ngenyathelo leli.
UBoko, ekhuluma labezindaba abeBBC uthe kuqakathekile ukusebenzisa ulwazi lwabe Zimbabwe abangena kweleBotswana, bezokwenza noma yiwuphi umsebenzi. Uthi inengi liyenza imsebenzi engafunwa ngabeBotswana okufana lokusebenza emapulazini kukanti eminye efana lokunusela lokwakha ingaphathisa abeBotswana ngolwazi.
Inkulumo kamongameli Boko iyamukelwe ngezandla zombili ngabeZimbabwe kweleBotswana bona abavame ukudlala umacatshelana lamapholisa ayabe edinga abaselizweni bengelamaphepha.
UNkosazana Simanga Dube uthi inyathelo likamongameli Boko lizabangela ukuthi basebenze amaphaphu ehleli phansi.
"Ngilokuthaba kakhulu mayelana lokuthi umongameli ufuna ukusipha amaphepha sihlale lapha sisebenza ngoba uma ungelamaphepha kunzima kakhulu. Kuhle ukuthi sibe selizweni ngokusemthethweni."
UMnumzana Thokozani Nyoni yena ongumbalisi uthi ukupha abeZimbabwe amaphepha kutsho ukuthi lelizwe leBotswana lizathuthuka kwezomnotho.
"Ku yi win-win kunxa zonke. AbeZimbabwe bayathuthukisa umnotho weBotswana ngendlela ezinengi besenza imsebenzi emngeni. Kodwa khonokho ukuthi basebenza becatsha kuyenza kube nzima."
Okunhlanganiso yeZimbabwe Community kweleBotswana, uMnumzana Cephas Tshuma, laye uthi bayakwamukela okukhulunywe ngumongameli Boko ngoba abeZimbabwe bephila nzima noma nje bona bephathisa ekuthuthukiseni umnotho weBotswana.
“Njalo futhi abantu abanengi uma usebenza ungelamaphepha, kade behlukunyezwa ngabaqatshi ngoba besazi ukuthi abalamvumo yokuba seBotswana. Njalo futhi uma ubanikeza amaphepha bayabhadala ukuwathola okulethela iBotswana imali enengi.”
Ihofisi yommeli weZimbabwe kweleBotswana yona ithi izalinda ukuthi umpathintambo ophathelane lendaba yokupha abokuza amaphepha, akhulumisane labo.
Kodwa abanye abeBotswana abafana loMnumzana Dikeledi Kwape bathi abafuni kuzwa ngaloludaba ngoba kusitsho ukuthi abeZimbabwe bazabathathela imsebenzi yona esiya incipha.
"Asivumelani lombono lo, ngobalokhu kutsho ukuthi siyabe sesibangisana labeZimbabwe kungamathuba omsebenzi, yona engasatholakaliyo.”
UBoko kakatsho ukuthi ukhangelele ukuthi lokhu kusungulwe nini, kodwa uthole usekelo kwabanye abathi akusizi ukuthi begqibele amakhanda phansi njenge ntshe ngoba vele abeZimbabwe sebekhona elizweni.
Namuhla nje, uBoko ufungise umphathintambo wendaba zaphakathi kwelizwe kweleBotswana, onguye ozakuba ekhangele udaba lokuphiwa kwabantu bokuza amaphepha okusebenza lokuhlala elizweni ngokusemthethweni, ama work kanye lama residence permit.
UMnumzana Pius Mokgware, owayelesikhundla esiphezulu esisotsheni, nguye umphathintambo wogatsha lwe Labour and Home Affairs.
Forum