Izizalwane zeZimbabwe kweleSouth Africa sezethule imibono eyehlukeneyo ngemva kwenkulumo kamphathintambo wogatsha lwezemidlalo uMnumnzana Gayton Mackenzie, lowayengumongameli wakweleSouth Africa, uMnumnzana Thabo Mbeki, lenkosi yakwaZulu uMisizulu Zwelithini bona abathi akulunganga ukuvimba abakwamanye amazwe ukuza elizweni leli ngoba banikela konke ababelakho kunkululeko yeSouth Africa.
Ekhuluma ekusungulweni kwenhlelo zenyanga kaMpandula njengenyanga yamagugu lamasiko, uMckenzie owaziwa kakhulu ngenkulumo yokuthi ‘abahambe’ ebhekiswe kwabokuza kweleSouth Africa, uthe awulunganga umkhuba wokuvimba abakwamanye amazwe ukuthi beze eSouth Africa ngoba bancedisa kakhulu kunkululeko yelizwe.
“IZambia, iZimbabwe, iRussia, Angola, leNigeria wonke lamazwe agcina abantu bethu ababebalekela impi. Amanye amabutho alamazwe abulawa ngenxa yokwemukela abalweli benkululeko beSouth Africa. Le yinto okungafuzanga siyikhohlwe.”
Inkulumo yakhele iza sikhathi sinye lesanda kukhulunywa nguMbeki yena othi uphikisana kakhulu lezizalwane zakweleSouth Africa lezinye inkokheli ezithi ubunzima bezomnotho elizweni bubangelwa yikugcwala kwabantu bokuza abathatha imisebenzi.
“Angingeke ngikuvume ukuthi ukuntengantenga komnotho wethu lokusilela kwemisebenzi kubangelwa ngabantu bokuza ngoba lokhu akusilo qiniso. Kubangelwa ngesingakwenzanga kuhle thina.
INkosi yakwaZulu layo uMisizulu kaZwelithini usanda kwethula inkulumo efanayo egqugquzela ukuphela komkhuba wokucwasana ngobuzwe.
“Sibanengi sikufisa ukuba sihlangane sibemunye. Singabalahli abelungu. Ma befuna ukuba ngamaZulu kulungile abeze nabo. Namandiya ngokunjalo. Njengoba libona kuvela amakhosi iNkosi yaseUganda lezinye izizwe ngokunjalo. Bayamthanda uZulu. Bafisa ukuthi bebemunye kanye nani.”
Inkulumo zalezi inkokheli ezethulwa ngesikhathi sekukhuphuke kakhulu ukuzingelwa kwabangelamaphepha kweleSouth Africa bebanjwa bebuyiselwa kubo, zemukelwe ngendlela etshiyeneyo yizizalwane zeZimbabwe.
Isizalwane seZimbabwe njalo engumqondisi wenhlanganiso yePhoenix Foundation of Zimbabwe uMnumnzana Dumisani Nleya uthi inkulumo kaMackenzie yimpicabadala.
“UMckenzie into aseyenzile ivele isidale umonakalo omkhulu kakhulu okokuthi akungeke kusatshintsha engqondweni zabantu lokho akukhuluma ekuqaleni. Sewenza abantu baba lengqondo yokuthi abantu bangaphandle abahambe olephepha longelaphepha.”
Umgcinisihlalo wenhlanganiso yeProgressive Zimbabwe Foundation uMnumnzana Lance Mlilo laye uthi linkulumo ayitsho lutho endlebeni zalabo abafundiswa ukuthi abokuza abafuneki kwele South Africa.
“Okusimangazayo lomuntu nguye uMinister owenza amaslogan esithi abahambe esitsho bona phela abokufika. Ngibona angathi sekufake ukudideka kakhulu ukuthi ngabe lenkulumo iqonde ukuthini?
Esinye isizalwane seZimbabwe uMnumnzana Jonathan Mbedzi yena uthi liqiniso elingavikekiyo leli elikhulunywe nguMbeki ngoba ukudlalisa imali kubotshwa abantu bokuza akukaze kusebenze.
“Bake bakwenza oSteve Tshwete some years ago. Bake bakwenza oButhelezi some years ago but there is nothing. The only thing engenza kusetshenziswane la eAfrica is to legalise abantu la eSouth Africa bethole incwadi zonke ezikhona.”
Isizalwane sakweleSouth Africa, uMnumzana Someleze Siguqu, uthi vele akulunganga ukucwasa ngobuzwe kodwa okufunekayo ngokutshiwo yilezi inkokheli ukuthi abokuza abeza kwele South Africa bangene ngokusemthethweni hatshi ngudlu.
Abasiki bebunda bathi amazwi laMackenzie la aqonde nta, ngoba njengomphathintambo kahulumende akasenelisi ukwethula amazwi enzondo ngoba sekulemigoqo emphoqela ukuthi akhethe amagama ngoba konke akukhulumayo usekhuluma emele uhulumende hatshi ibandla lakhe.
Forum