Abenhlanganiso ezimele izizalwane zeZimbabwe esezihlala kweleSouth Africa baveza ukukhathazeka okukhulu ngokuthula kukahulumende walelo lizwe, ngodaba lokuthi amapermit aweZimbabwe Special Permit, aphiwa amalunga, aphose afike inkulungwane ezingamakhulu amabili(200,000), azavuselelwa kumbe hatshi nxa ephelelwa yisikhathi ekupheleni kukaMpalakazi.
Inyathelo likahulumende wakweleSouth Africa lokungaphumeli obala ngokuthi iyozala nkomoni nxa amapermit la ephelelwa yisikhathi mhlaka 31 Mpalakazi 2021, selitshiye ikusasa yenengi labeZimbabwe abalamapermit la libuvilibana.
Baphose bafike izinkulungwane ezingamakhulu amabili (close to 200,000) abeZimbabwe abaphiwa amaZimbabwe Special Permits abapha ilungelo lokusebenza, ukufunda lokuqhuba amabhizimusi kweleSouth Africa okweminyaka emine.
Kusukela ngo 2010 uhulumende ubewavuselela amapermit la ngemva kweminyaka emine, njalo ubekhuluma kusase lesikhathi ukuthi ayavuselelwa kusenzelwa ukuthi izizalwane zeZimbabwe lezi zilungise konke okufunekayo kugoqela lamaphasipoti asesalelwe yiminyaka emilutshwana.
Lobanje sekusele inyanga ezintathu kuphela ukuthi amapermit la aphelelwe yisikhathi, ihofisi yomeli weZimbabwe kweleSouth Africa ithi ilokhu isalinde ukuthi iSouth Africa yethule isinqumo sokuthi kuzakwenzekani.
Isiphathamandla sale ihofisi uConsul General Melody Chaurura utshele umhlangano obuqoqwe yinhlanganiso ye SILO kweleSouth Africa ukuthi zonke inkulumo ezidingekayo sezenziwe sekulindwe idale labaphathintambo kweleSouth Africa ukuthi lethule isinqumo ngekusasa yamapermit la.
“Inkulumo ngaloludaba sezenziwe sesilinde uhulumende weSouth Africa ukuthi atsho azakwenza.”
Lokhu sekutshiye inengi labeZimbabwe besevalweni olukhulu.
Umgcinisihlalo wenhlanganiso emela abeZimbabwe kweleSouth Africa umnumnzana Ngqabutho Mabhena uthi ukungacaciswa kwaloludaba kuzenza impilo ibenzima kakhulu kuzizalwane zeZimbabwe lezi.
“Kulengozi yokuthi nxa kungakhulunywanga masinyane kumbe engazange evuselelwe amapermit amabhanga azovala ama account abo ngoba ama bank accounts avulwa ngepermit. Abaqatshi abasakwazi ukuthi kambe laba abantu abasebenzayo bazabe bekhona ngomnyaka ozayo kumbe bayabe bengasekho. Lathi silindele yena uminister udokotela uMotsoaledi ukuthi achasise ukuthi kuzahamba njani.”
Umgcinisihlalo wenhlanganiso elwela amalungelo abesifazana eyeZim Imbokodo unkosazana Victress Mathuthu uthi ayikho into enzima njengokungazi ukuthi ikusasa lakho limi kuphi.
“Kuyasikhathaza kakhulu. Sihlalele evalweni. Asazi loba ayavuselelwa loba awavuselelwa lokuthi loba ezavuselelwa azavuselelwa okwesikhathi esinganani ngoba inyanga sezisele sezintathu. Abanengi sebeqalisile ukubuzwa lasemsebenzini ukuthi njengoba iphephamvume lakho lokusebenza lapha eSouth Africa seliphelelwa yisikhathi uzokwenza kanjani. Awukwazi lokunika abaqatshi impendulo eqondileyo ngoba lathi asazi ukuthi kuzokwenziwani. Asazi loba abantu bazaphelelwa yimisebenzi.”
Imibuzo ebithunyelwe isikhulumeli sikamphathintambo wogatsha lwendaba zasekhaya kweleSouth Africa ebidinga ukwazi ukuthi kungabe isinqumo sesithethwe na ngaloludaba lokuthi kukhangelelwe ukuthi isaziso sethulwe nini, ibingakaphendulwa ngesikhathi sokuya emoyeni.