Ezinye izizalwane zeZimbabwe ezihlala eBotswana zingelamaphepha zivalelwe omakhalekhukhwini bazo kulandela ukwethulwa komthetho ophoqa abantu ukuthi babhalise amaSIM cards ngokusemthethweni phansi kohlelo olwaziwa ngokuthi Know Your Customer (KYC).
Ukuze umuntu abhalise bekudingakala incwadi zokuhlala kumbe ukusebenza kweleBotswana.
Kodwa abantu abedlula ingxenye yesigidi (600,000), abagoqela abokuza lezizalwane zakweleBotswana behlulekile ukubhalisa ngezizatho ezitshiyeneyo ngesikhathi esasihlelwe yiBotswana Communication Regulatory Authority (BOCRA), esiphele mhlaka 30 Nhlangula.
Lokhu kudale ukuthi baqunyulwe incingo zabo, okutsho ukuthi abaselandlela zokukhulumisana labanye kanti labagcina imali emabhanga ngenhlelo zabomakhalakhukhwini, i-mobile money, abasenelisi ukufinyelela limali.
UMnu Cosmos Sibanda odabuka eZimbabwe uthi noma kubuhlungu okwehlele abanye bakhe, umthetho ngumthetho kumele ulandelwe.
“Indaba ye KYC inzima, kodwa akula ngeyinye indlela ngoba umthetho ngumthetho. Sikhala sisiyaphambili sizabona ukuthi singenza kanjani, kodwa akula okungenzakala, ” kutsho uSibanda.
Ikhomishini eyeBOCRA ithi ubani lobani ofuna ukusebenzisa umakhalekhukhwini kumele abhalise inombolo zakhe ngokusemthethweni.
AbeBotswana babhalisa besebenzisa izithupha kuthi abokuza kumele babe lencwadi yephasiphothi kumbe amaphepha okuhlala kumbe ukusebenza kweleBotswana.
UMnu Ntokozo Thebe, omunye wabavela eZimbabwe uthi, “Siyakuthola abakufunayo, kodwa ngokubona kwami amakampani amanengi azalahlekelwa yibhizimusi njengoba inengi seliphume emoyeni.
“Abantu bekhaya kade bengcina imali zabo besebenzisa omakhala ekhukhwini. Kade besehluleka ukuvula ama accounts emabhanga manje khathesi sokuzatsho ukuthi imali enengi igcinwa ezindlini,” kutsho uThebe.
Okunhlanganiso yabeZimbabwe kweleBotswana uMnu Cephas Tshuma uthi kulezinye indlela engabe zisentshenzisiwe ukubona ukuthi abantu bayabhalisa inombolo zabo.
“Ngokubona kwami lokhu okwenziwe yiBOCRA akulunganga ngoba ungeke watshintsha imthetho endleleni. Zikhona indlela abangazisebenzisa ukuthi badingisise ukuthi ubani ngubani osebenzisa umakhala ekhukhwini,” kutsho uTshuma.
I-BOCRA ithi abalamaphepha aqondileyo bangayabhalisa ukuze bathole ukusebenza njalo kwabomakhalekhukhwini babo.
IBOCRA ithi uhlelo olwe Know Your Customer yindlela yokuthi kuhlale kulomzila wokuthi kwaziwe ukuthi ngubani osebenzisa inombolo ethile kamakhala ekhukhwini, funa kube lokudalwa kwecala kusentshenziswa leyonombolo.
Forum