Kuqhamuke ingxabano phakathi kwabasekeli bebandla eliphikisayo eleZAPU labe ZANU PF ngemva kokutholakala ukuthi abe ZANU –PF lokhe beqhubekela phambili bethathela abantu inombolo eziyibufakazi bokuthi umuntu ubhalisele ukuvota laloba kusazakala ukuthi yikwephula umethetho.
Lokhe kwaqala uhlelo lokubhalisela ukuvota sekubelembiko embalwa eyokuthi kulamalunga ebandla elibusayo eleZANU PF ahamba elandelela abantu ethatha amaserial numbers okwenza ikomishini yeZEC kunye lamapholisa bakhiphe umbiko wokuthi abathatha inombolo lezo bazokujeziswa.
Ngokunjalo kubikwa umbuthano wabantu abekade behola ukudla eGwanda uchithiziwe ngamalunga eZAPU ngenxa kokuthi abanye abantu bebencitshwa ukudla ngoba bengavezanga amaserial numbers abo.
Isikhulumi seZAPU umnumzana Iphithule Maphosa uthi Izanu- pf iyaqhubeka ithatha inombolo zama serial numbers emaphandleni ethi bakwenza lokho besethusela abantu ngokuthi bazabancitsha ukudla lapho kuholiswa uzulu amabele. Uthe njalo lokhuyibuqili kutshengisa ukuthi ibandla leZANU- PF seliqalile ukuqila ekhethweni lwalonyaka.
U- Maphosa ugcizelele wathi basabuthanisa ubufakazi obaneleyo ukuze bethi nxa besiyamangala belofakazi obaneleyo.
Unkosikazi Lebone Nyathi ohlala eGwanda uthi ngesikhathi besiyahola amabele batshelwe ukuthi amabele azaphiwa labo abanikeze iZanu amaserial numbers ngakho kwasokusiba lokuxokozela kakhulu ngenxa yalokho phakathi kwabantu abeZAPU labe ZANU.
Izakhamizi zeBubi lazo zikhalaza ngohlupho olufanayo, Umnumzana Hilton Moyo owe Clanmore eBubi uthi bathi beqeda ukubhalisela ukuvota balandelwa ngumuntu ethatha inombolo zamaserial number ethi bazisa emasotsheni.
Esinye njalo isakhamuzi umnumzana Peter Munsaka uvumelane loMoyo kodwa ethi abakamangaleli loyo obethatha inombolo zabo.
Akukabilembiko yabantu asebebotshiwe bebotshelwa ukuhamba bethatha inombolo zabantu laloba iZec kanye lamapholisa athi abakwenzayo kumele bajeziswe.Ukhetho lukhangelelwe ukubakhona enyangeni kaNtulikazi kuwonalo umnyaka ka2018.
