Sokuqhamuke ukukhonona okukhulu kuZanu PF amanye amalunga alelibandla esithi afuna umgcinisihlalo wogatsha olubona ngezokhetho, olweZimbabwe Electoral Commission uMnu Simpson Mutambanengwe akhutshwe esikhundleni sakhe ngoba ekhanya esekela ibandla leMDC.
AbeZanu PF laba bapha umzekeliso wokuthi uMnu Mutambanengwe wakhuluma amazwi aveza sobala ukuthi weyamele kucele leMDC kunsuku ezisanda kwedlula kweleSpain lapho abikwa wasola khona ababengabalweni bempi yenkululeko esithi babangela udlakela ikakhulu emaphandleni.
UMutambanengwe ubikwa wethula amazwi la emhlanganweni owawuqoqwe yinhlanganiso ye International Institute of Democracy lapho iziphathamandla zeZEC ezazimenywe khona ukuthi zizekhulume ngodaba lokhetho eZimbabwe.
Kungxoxo ayenze leStudio 7 uMnu Mutambanengwe ukulandule ukubana wakhuluma amazwi awetheswayo yiZanu PF.
AbeZanu PF basola njalo uMutambanengwe ngokuhlala ekhuluma ngokuthi iZEC ayilamali yokwenza ukhetho lonyaka, besithi lo ayisumsebenzi wakhe. Bathi kusobala ukuthi ungenela kwezombusazwe, ngalokhu kumele atshiyiswe umsebenzi.
UMutambanengwe, ekhuluma lalumsakazo, ukulandule ukubana uthatha uhlangothi emsebenzini wakhe. Uthe kungumlandu wakhe ukuthi akhulume ngokuthi iZEC ayilamali njengomgcinisihlalo walolugatsha.
Isikhulumeli seZanu PF uMnu Rugare Gumbo uthe ngempela ibandla lakhe alijabuli ngendlela uMutambanangwe aziphatha ngayo.
"Kusobala ukuthi uMutambanengwe uthatha uhlangothi njalo le yinto esikhathazayo njengebandla leZanu PF," kubike uGumbo.
Ukuhlaziya loludaba sixhume ingxwethi ecubungula ezombusazwe uMnu Dumisani Nkomo yena othe uMutambanengwe ufela ukhuluma iqiniso.
