Sekuqhamuke ukufuthelana okukhulu phakathi kwezizalwane zakweleSouth Africa labantu bokuza eSoweto ngemva kokufa lokungcwatshwa kwabantwana abayisithupha okubikwa ukuba badle abakuthenge esitolo somuntu wokuza.
Intukuthelo yezizalwane zakweleSouth Africa le ilandela ukufa kwabantwana abayisithupha eNaledi eSoweto ngeviki ephelileyo. Kubikwa lababantwana bathenga ezimnandi ezithandwa ngabantwana kwesinye isitolo somuntu wokuza.
Lokhu kubangele ukuthi bathwalelwe esibhedlela lapho abafike bafela khona. Ngemva kwemfa yalababantwana kuhle kwaqhamuka udlakela ezinye izakhamizi zangena ngodli emavinkilini la zathatha impahla yalesisitolo, zaqala njalo ukuxotsha abanye abokuza abathengisa endaweni yaseNaledi. Ngesikhathi kungcwatshwa abahlanu balaba bantwana ngeSonto edluleyo, izakhamizi bezisidla amalahle.
Abanye bathi nxa abokuza bonke bengaphumanga eSoweto bazawukhomba olotshwala. Ngakwelinye icele, abanye bathi zonke izitolo zabantu bokuza kweleSouth Africa kufanele bazithathelwe ziphiwe izizalwane zakweleSouth Africa.
Induna yomdabu eSoweto uHloniphisa Chonco utshele iStudio 7 ukuthi kabafuni kuphinde kube lomunye umntwana ofayo ngenxa yabokuza laba.
“Lababantu kufanele bahambe bebuyele kubo, hayi kabi, kodwa bathathwenje bangashaywa, kungathathwa into zabo. Njengami lapho engihlala khona ngizohlala necommunity phansi ngibonisane nabo ukuthi lababantu asibakhipheninje kahle sibize amapoyisa bahambe babone ukuthi bashoniswaphi ngoba zizosiphelela ingane.”
UNkosazana Lydia Munyatso, umgcinisihlalo wamapholisa esigaba eNaledi, uthi lesi sehlakalo esingayisiso sakuqala, sesidale usizi lokufuthelana okukhulu emphakathini.
“Ibuhlungu. Asiyithandi njenge CPF. But sicela ukuthi umphakathi usebenzisane hand in hand namapoyisa. We are intervening kuyo yonke le situation. So, asikhomnandi nathi as CPF. As a mother, singabazali nathi. So lento le esiyibonayo ayisiphathanga kahle.”
Ukufuthelana lokhu sekutshiye inengi labeZimbabwe abahlala eSoweto besesabela impilo zabo. Owesifazana oweZimbabwe okhethe ukwaziwa kuphela ngokuthi ngumaNdlovu uthi sebelala bevale ilihlo elilodwa.
“Lento isiphethe kabi kakhulu ngoba sekushone ingane ezingela cala. Okwesibili manje sekuzogoqela lathi abantu beZimbabwe ukuthi basixotshe ngoba lento yenziwe ngumuntu wangaphandle. So, nje isiphethe kabi kakhulu.”
Esinye njalo isizalwane seZimbabwe esihlala eSoweto esingathandanga ukuvezwa igama sithi sekufuze abokuza bazinuke abakhwapha.
“Kuyinto ebuhlungu kakhulu ebazalini bonke. Kuyinto ebuhlungu kakhulu emphakathini waseSouth Africa. Ngoba zonelwa mvunye kutsho khona ukuthi uma bethi bayadudula kuzodudulwa wonke umuntu wokuza. Angeke bakhethe ukuthi ulesitolo esincane lesi noma uthengisa ngaphandle, noma usebenza umsebenzi onjani kodwa as long uphuma ngaphandle ma kuyisikhathi sokududula abayikutshiya yena umuntu oyi one.”
Banengi abadabuka eZimbabwe abahlala eSoweto. Abanye babo bathengisa emigwaqweni kubelabanye njalo abalezitoto lezi ezincane. Umkhokheli kahulumende wesabelo seGauteng uMnuzana Panyaza Lesufi uthi ngeke lesisehlakalo senzeke kungabi khona ojeziswayo.
“Sesilaye amapoyisa ukuthi asebensize ubuciko obukhulu ekucwayisiseni imfa yalaba bantwana. Kufanele baze bathola lokuthi ukudla lokhu okudliwe yilaba bantwana kwenziwe ngubani, kuphi? Kungizwisa ubuhlungu kakhulu lokhu okwenzeke ebantwaneni besikolo.”
Phose minyaka yonke kweleSouth Africa kuqhamuka udlakela olubhekiswe ebantwini bokuza endaweni ezitshiyeneyo. AbeZimbabwe okuyibo abanengi ebantwini bokuza kweleSouth Africa bathi besabela ukuthi nxa kungaqhamuka loludlakela impilo zabo zingaba nzima kakhulu.
Forum