Abesifazana baseZimbabwe sebethe bahalalisela eleZambia ngokukhetha uNkosikazi Mutale Nalumango ukuba ngumsekeli kaMongameli Hakainde Hichilema kukhetho olusanda kwedlula. Bancoma ikakhulu ukulinganiswa kwamathuba obulili kulelozwe besithi kuyahtembisa ukuba kuzaqhutshwa ngcono uma kuqathaniswa laseZimbabwe lapho amathuba abesifazana obukhokhela lokhu encipha.
Umgcinisihlalo wekomishini ebona ngezokhetho, eye Electoral Commission of Zambia, uMnu Isau Chulu nguye owethula isaziso emsakazweni kamabonakude oweZNBC esithi UMnu Hakainde Hichilema unqobile kukhetho oluqhutshwe ngoLwesihlanu lweviki ephelileyo. Ngakhoke uNkosikazi Mutale Nalumango webandla lakhe eleUNDP usezaba ngumsekeli wakhe.
Abesifazana beZimbabwe bamukele limpumela le ngenjabulo yokuba owesifazana nguye osethole isikhundla saphezulu sokuba ngumsekeli kamongameli komakhelwane.
Ilunga ledale lephalamende koBulawayo jikelele uNkosikazi Jasmine Toffa uthi okwenzakale eZambia kuyinto ebukekayo abafisa ukuba ngabe iyenzakala lakuleli.
“Ngikhuluma ngithabele lokhu okwenziwe eZambia ngokukhetha umama ukuba ngumsekeli kaMongameli. Lokhu kutshengisa ukuba umongameli walelizwe ukubone kuqakathekile ukuba asebenze labomama banakekelwe lokutshengisela ukuba umuntu ongumama yingxenye yelizwe kwezombusazwe njalo sifisa ukuba lokhu kubekhona kwelakithi eZimbabwe.”
Ilunga leMRP eMguza kuProvincial Executive Committee, uNkosikazi Zodwa Nkiwane uthi okwenzakale eZambia kubapha ithemba lwempumelelo yabesifazana.
“Ngijabule kakhulu ngokhetho lweZambia ngoba lugqugquzele kakhulu ukuba lathi sisebenze singazideleli ukuze lathi siphumelele njengomama weZambia ukuze labomama bakhanye bephatha izihlalo zobukhokheli eziphezulu.”
Olwela amalungelo oluntu uNkosikazi Cora Ndebele uthi lokhu kubonisa ukuba amalungelo abomama azaqakathekiswa eZambia.
“Kuyasijabulisa kakhulu ukubona uHichilema ekhethe ukuba asekelwe ngumama kuyathokozisa kubonisa ukuba amalungelo abomama ayaqakathekiswa njalo omamabazaphatheka ekubuseni siyafisa ukuba okwenzakala eZambia kwenzakale kithi ngoba kunje ipresidium yakithi ilabobaba bodwa okweZambia siyakujabulela kakhulu ngoba omama ngeke basale kwezokuphatha ilizwe.”
Unkosikazi Linda Sibanda ophatheka kwezombusazwe uthi ukukhethwa kukaNalumonga kukhuphule izinga labomama eAfrica.
“Siyabonga uHachilema leUNDP ngokukhethaa uNalumango ukuba amsekele, lokhu kuphakamise kakhulu izinga labomama kwezombusazwe, sitshengiselwe ukuba lathi siqakathekile, simfisela okuhle, njalo lokhu kutshengisa ukuba ulokholo labesifazane. Sicela angakhangelelwa phansi njengomama othwele ilizwe kodwa laye isikhundla sakhe sicela asiphathi ngeze isikhundla sakhe ngoba ukuphambanisa kwakhe njengoVP inhlamba zakhona ziyakubobonke omama. Sibonga ukuqakathekiswa eZambia njengaboMama.”
Umabhalane jikelele webandla leUNDP, uBatuke Imenda wenze isimemezelo ethi umongameli weZambia uMnu Hakainde Hichilema uyagcotshwa ukuba ngumongameli ngeviki ezayo NgoLwesibili kanye laye uNkosikazi Nalumango efungiswa ukuba ngumsekeli wakhe.