Abesifazane abangamatshumi amathathu lambili abahanjiswa eKuwait okungaqedakaliyo bafika batshapazwa kulelolizwe sebebuyele eZimbabwe.
Bathe befika ngoMgqibelo ntambama, bekhatshwe ngusomlomo wedale lephalamende uMnu. Jacob Mudenda labanye bakhe, bahle bafihlelwa uzulu bahanjiswa endlini lapho abazahlala khona okwesikhatshana bekhangelwe ngodokotela lengcwethi ezibona ngesimo sengondo.
Kabavunyelwanga ukuthi bakhulume lentathelizindaba kumbe babonane lezihlobo bengakahlolwa emzimbeni ngabezempilakahle.
Ekhuluma egcekeni lendizamtshina eleHarare Airport, uNkosikazi Prisca Mupfumira omele uhlangothi lukahulumende olubona ngezabaswelayo, uthe uhulumende uzakwenza konke okusemandleni akhe ukwenzela ukuthi abesifazana laba baphathiswe ngalokho abakufunayo.
“Sizahlolisisa imzimba yabo njalo lokuthi bangabe bephile njani engqondweni njengoba babethwele nzima eKuwait.”
Uthe nxa sebehlolisisiwe zingcwethi ezitshiyeneyo bazavunyelwa ukuthi bayekuzihlobo zabo njalo bakhulume abakufisayo.
UMupfumira uthe okwamanje kumele uzulu ahloniphe ilungelo labesifazane laba abanye babo ababedlwengulwa ngabaqhatshi eKuwait.
Ophinde wakhuluma ngodaba lolu eHarare Airport, uMnu. Simbarashe Mumbengegwi, okuhlangothi lukahulumende olubona ngezokudlelana lamanye amazwe, uthe kuzamele bahlolisise indlela abesifazane laba abahanjiswa ngayo eKuwait.
“Sifuna ukuphendlisisa isisusa sodaba lolu sidinge bonke labo abathumeza izizalwane zeZimbabwe eKuwait okungekho emthethweni.”
UMudenda, obuye labesifazane laba, uthe abesifazane laba babethwele nzima eKuwait njengoba abanye babo babebhinywa ngabaqhatshi.
Uthe isimo sabo siyethuse amanye amalunga edale lephalamende akade ehamba labo abacine beqhinqa isililo.
UMudenda uthe abesifazane ababili batholakale becatshe esigoldweni seZimbabwe eKuwait labanye akade bevalelwe esitokisini samapholisa.
“Bazibuyele bengela lutho. Baphethe izandla. Badubeke okumangalisayo.”
Esinye njalo isiphathamandla sikahulumande, uNkosikazi Nyasha Chikwinya, obona ngezabesifazane, uthi uzulu akumelanga akhangwe ngemali ukuthi ayesebenza emazweni,
Uthe kumele abantu makhaza bahlolisise okungabehlela bengakasuki eZimbabwe nxa besiyadinga umsebenzi kwamanye amazwe.
Umnotho welizwe leZimbabwe ugaqe ngamadolo okwamanje okwenza ukuthi abantu abanengi bayedinga imisebenzi kwamanye amazwe.