Abesifazana abahlala emaphandleni bathi ukuqhamuka kwegcikwane leCorona Virus kanye lokuvulwa kwelizwe ngohlelo lweLockdown kudale ukubhidlika kwenhlelo zabo ezokuziphilisa emakhaya osokubatshiye bebhekane lendlala embi. Lokhu kuvele abesifazana laba benanza ilanga labo eleInternational Rural Women’s Day ngoLwesine lapho abakhale ngoncedo lokuvuselela inhlelo zabo
Inengi labesifazana bemaphandleni eZansi yemaNdebeleni liphila ngokulima ezivandeni, ukuthunga kanye lokuthengisa impahla abaziwoda phandle kwelizwe.
UNkosikazi Effie Dlomo olilunga leSiyazama Garden eMakwilile eSitezi, uthi basungula lesisivande beyisitshiyangalombili belenjongo yokuthi baziphilise kodwa selokhu kwaqhamuka igcikwane leCOVID 19 ngoMbimbitho, abakulimayo akuthengwa.
Amazwi akhe asekelwe nguNkosikazi Gesta Mbangeni osuka eSigabeni seSizanani eSitezi, yena othi bathunga amadoyili, ingcebethu lamacansi ukuze bebhadalele abantwana indleko zesikolo.
UNkosikazi Sihlezi Ncube ngomunye wabafelokazi eSitezi. Uthi bebethenga imbuzi labanye bakhe belitshumi njalo bewoda impahla bethengisa kodwa loluhlelo seludilika.
UNkosikazi Josephine Majaha uthi lanxa bebhekane legciwane leCoronavirus akulasizo abalutholileyo njengabesifazana ukuze bezivikele kulo.
Lanxa amalungiselelo okulima eseqalile emakhaya abesifazana bathi badinga ukuncediswa ukuze benelise ukuphuma lesivuno esihle ukuze banakekele imuli zabo, kutsho uNkosikazi Agnes Khumalo.
UMqondisi wenhlanganiso elwela amalungelo abesifazana eyeWomen Development Association of Zimbabwe - WODAZ uNkosikazi Juliet Nkiwane uthi inengi labesifazana lisukume layagebha igolide ngesikhathi seLockdown okubafake engozini yokuhlukuluzwa ngabesilisa.
Ekhuluma emhlanganweni oqhutshwe edolobheni leGwanda kuyonale iviki, umqondisi weZimbabwe Christian Alliance uMnu. Useni Sibanda uthe bazasungula uhlelo lokuxoxisana lozulu obhekane lengxaki ezilethwe yikuqhamuka kwegciwane leCoronavirus.
Umphathintambo wogatsha lwabomama lamabhizimusi asacathulayo uNkosikazi Sithembiso Nyoni utshele umsakazo weStudio 7 ukuthi kunengi uhulumende akwenzayo akuze athuthukise inhlalakahle yabesifazana emakhaya.
Uthi kumaviki amabili adlulileyo bebeseMzingwane lapho abanikeze abesifazana imitshina yokufukamisela amaqanda, izigayo, imitshina yokwenza amafutha okuphekisa lokunye.
Usuku lokunanza imisebenzi yabesifazana bemaphandleni lonyaka luqhutshwe phansi kwendikimba ethi “Building Rural Women’s Resilience in the Wake of COVID-19,” okutsho ukuthi ngubani lobani ulomlandu wokubasekela ukuze bavuselele inhlelo zabo zokuziphilisa njalo belungiselele ukumelana lengxaki ezifanayo ezingavela phambili.
Lulandelwe lusuku lokulwisana lendlala emhlabeni jikelele izolo olwe World Food Day abenhlanganiso yeWorld Food Programme besithi abantu abedlula izigidi ezinhlanu 5,4 million badinga usizo lokudla emaphandleni.
