Abesifazana abahlala emaphandleni bathi kuyadingeka ukuthi kusungulwe inhlelo zokuhlola abantu ukuthi balomkhuhlane wemvukuzane kumbe hatshi emakilinika lasezibhedlela ezigabeni zabo ukuze benelise ukufinyelela lolusizo kanye lokwelatshwa ngokuphangisa. Lokhu kuvele ngesikhathi kunanzwa ilanga leWorld World Cancer Day ngoMgqibelo.
UNkosikazi Matilda Dube odabuka eInsiza South uthi azitholakali indawo zokuthi bayehlolwa eminye imkhuhlane wemvukuzane ngemitshina ngaphandle kweyebele kuphela.
Kungakho uthi kuyadingeka ukuthi labo bahlolwe lumkhuhlane emaphandleni ukuze bathole ukwelatshwa kusesemasinyane.
UNkosikazi Siphathisiwe Nkala oweSilikwe uthi lanxa abezempilakahle bayake befike emakhaya abahloli wonke umuntu.
Umqondisi wenhlanganiso emela amalungelo abesifazana lamantombazana eyeWomen Development Association in Zimbabwe uNkosikazi Sethekele Tshabangu uthi akula sizo olutholakala emakilinika emakhaya.
Kungakho uthi kuyadingeka ukuthi kuqhatshwe odokotela abazingcitshi kumkhuhlane wemvukuzane ezibhedlela ezisemakhaya.
Umqondisi wezempilakahle eZansi yemaNdebeleni uNkosikazi Rudo Chikodzore uvumile ukuthi abalayo imitshina yokuhlola kanye lokwelapha imvukuzane esixhwalile.
Uthi kodwa balazo indawo zokuhlola imvukuzane ezikhulu zemaphandleni.
Lonyaka umkhankaso wokulwisana lomkhuhlane wemvukuzane unanzwe phansi kwendikimba ethi ‘Closing the Cancer Care Gap,’ okuyinkuthazo kubohulumende bamazwe omhlaba ukuthi bethulele wonke umuntu inhlelo zokwelatshwa lumkhuhlane ngokulinganayo.
