Omama bemaphandleni sebekhuthazwe ukuthi bangene kwezombusazwe ukuze balingane labesilisa edale lephalamende. Lokhu kuza ngesikhathi inhlanganiso zabesifazana zilokhu zikhonona ngokungalingani kwamathuba abesilisa labesifazana edale lephalamende.
Loba nje kulezihlalo ezibekelwe abasifazana edale lephalamende, omama bathi kuyadingeka ukuthi bathole njalo ezinye izihlalo ukuze indubo ababhekane lazo zikhangelwe.
UNkosazana Moreen Nyathi, umqondisi weWomen’s Coalition of Zimbabwe eZansi yeMaNdebeleni, uthi omama bemaphandleni akumelanga besabe ukulingana labobaba.
“Kwamanye amaCommunities uyathola kuthiwa umama engasukumi, ukhulumani vele wena?. … Umama kahlali esitulweni umama kenelisi kukhuluma ebantwini okulamadoda kuthiwa thula wena umsebenzi wakho ngowekhitshini. Kodwa omama balelungelo kuConstitution iyabasekela ukuthi balelungelo lokuthi bakhulume lapho abahlukumezwa khona.”
UNkosikazi Julieth Nkiwane uthi umkhuba wabomama wokungakhulumi ungena lasephalemende lapho inengi elifika lizihlalele nje.
“Umama nxa ekhethwe yipolitical party yakhe ufika ephalamende kasabi lomlomo ngoba ipolitical party iyabe ivele imnike imilayo yokuthi uyakhuluma lokhu lalokhu. So, nje nge civic society sithi iquota system ayikhangele lakuma independent women, bakhona omama abangekho kupolitics so it should be extended to independent women.”
Amazwi akhe agcizelelwe nguNkosazana Bridget Moyo owogatsha lwabomama kuhulumende olweWomen’s Affairs.
“Iquota system incedisile kakhulu though singakatholi esikufunayo …”
UNkosazana Sipho Maphosa uthi kuyadingeka njalo ukuthi omama abangena edale lephalamende bathole imfundiso ngalokhu okumele bakwenze ukuze bengalahleki.
“Ngaphandle vele kokuthi awusafikeleki usunguHonourable Bridget vele awusasazi, kasagudleki kasakwanisi lokuthi sibike inhlupho zethu kuye yena sekwesinye isibanga sebona ingathi thina sesingabantu …”
Kusenjalo, uzulu wemaphandleni ukhala ezimathonsi ngokuqonga kwentengo yempahla ezitolo njalo inengi labomama elifana loNkosikazi Siphiwe Tshabangu oweNtepe lithi lithwele amagabha avuzayo.
“Uhlupho olunengi lwaziwa ngumama luphethwe ngumama siyananzelela ukuthi ungavuka ekuseni ngama four-five o’clock abantu obabonayo ngomama bethwele amabhasikiti lama khadibhokisi besiyawoda besenzela abantwana.”
Ukuqonga kwentengo yempahla ezitolo lokhu sekulethe ubunzima obuphindwe kabili kuzakhamizi zemaphandleni ezivele zibhekane lendlala ngenxa yokungani kahle kwezulu.
