Intengo yemvunulo yabesifazana abayisebenzisa ngesikhathi besemfuleni isiqanse okwamagama, isikhama ngitsho labasebenzayo. Lokhu sekubangele ukuba abesifazana bakhalaze becela ukuba uhulumende angenele.
UDokotela Mildred Mnkandla uchaza ukuqansa kwemvunulo yabomama.
“Nansi imihlolo nansi isimanga omama lamantombazana abakhethanga ukuya esikhathini. Baqala ukuya esikhathini kusukela kuminyaka elitshumi kusiya kumatshumi amahlanu. NgoZibandlela ebebiza itshumi lamadola lakho bekunzima ukuyithola limali. Iphakethe elilodwa elisiqedi ngenyanga basebenzisa amabili kusiya kwamathathu kuthi ababelethileyo basebenzisa okudlula lapho. Okwamanje iphakethe elilodwa selibiza amatshumi amathathu kanti vele ngobani abakhweza imali yemvunulo yabomama kangaka.”
Udokotela Mnkandla uqhubeke ethi uzwela ikakhulu abafundi asebezathwala qatha ngalintengo yemvunulo.
“Abantwana abaya esikolo sebezakuthatha ngaphi kudala kangaka kuthi omama ababelethileyo kuyabanzima. Sicela abakhuphula intengo yemvunulo yabomama ukuba behlise intengo njalo kulodubo lokusilela kwamanzi edolobheni lakoBulawayo. Intengo yemvunulo yabomama kumele yehle”
Osakhulayo wakoBulawayo uNkosazana Mildred Nkata ngomunye wabakhala ngokuqansa kwentengo yesanitary ware.
“Intengo yemvunulo iqala ku$50 thina amasakhulayo kudingakala ikhulu lamadola njalo lokhu kunzima ngesikhathi selockdown njalo amankazana acina esebenzisa izinto ezingalungelanga umzimba wabo kungabakuhle uma intengo le ingehliswa.”
Isakhamuzi semzini weNtumbane koBulawayo, uNkosikazi Grace Mutanda uthi bacina bebanjwa ngamandla ukusebenzisa izichibi.
“Udubo lokuqansa kwamapads kunzima kithi njalo kuzadala ubunzima obukhulu ezweni. Aqansile asisenelisi ukuwathenga ukudula kwayo kuzabangela ukuba sicine sigcika ngezichibi ezizacina zisidalela imikhuhlane engelaphekiyo. Siyacela ukuba kungakhangelisiswa kuloludubo njalo akusiphathi.”
Ilunga ledale lephalamende lakoBulawayo jikelele uNkosikazi Jasmine Toffa uchasisa ngemali eyabekelwa ukutholisa imvunulo yabomama kubafundi.
“UMin of Finance, uMthuli Ncube kubudget ka2020 wathembisa ukuba uzafaka eceleni imali efika $200 million yokuthengela abafundi ezikolo amapads emaphandleni. Ngokunjalo sikuCovid-19 lockdown abantu bayazisebenza kodwa sekunzima ngoba abantu bebengazilungiselelanga basebunzimeni.”
UNkosikazi Toffa laye ukhala ngokuthi intengo yamvunulo isiqonge okwedlulisa amalawulo.
“Omama lamantombazana baphakathi kobunzima intengo yempahla iqanse kakhulu njalo leyemvunulo yabo mama. Umama lamantombazana befuna bengafuni baya esikhathini besebenzisa imvunulo yonale esiqanse okwamagama. Imvunulo iqalisa kumatshumi amahlanu amadola kunzima sebezakhetha ukuthenga ukudla kumbe imvunulo. Kungabakuhle uma uMthuli engagcwalisa isithembiso sakhe.”
UMphathintambo wezempilakahle, uDokotela Obadiah Moyo NgoMbimbitho uthembise ukuba njengohulumende bazalukhangela udubo lwentengo yemvunulo yabesifazana kodwa kuze namanje akulalutho aselwenzile ukululungisisa.
Okwamanje imvunulo le, elentengo ephansi iqala kumadola angamatshumi amahlanu osekusinda inengi labesifazana ikakhulu amantombazana asakhulayo amelele ukuthengelwa ngabazali, ngalesi sikhathi labo bebhekane lobunzima obudalwe yikuvalwa kwelizwe ngeCovid-19 lockdown.