Abenhlanganiso ephathisa emsebenzini wokuhlinza abalesimo sokudabuka kwendebe laphakathi komlomo, eye Operation of Hope, yakwele Melika bakhangelelwe ukuqala ukuhlola abalalesi simo andubana babahlinze kusukela ngoMgqibelo esibhedlela seMpilo General Hospital koBulawayo. Abantwana laba bazahlizwa kungelambhadalo.
Umqondisi wenhlanganiso yeOperation of Hope, uDokotela Jennifer Mora, utshele iStudio 7 ukuthi sebelungele ukuqala ukuhlinza abantwana abaleminyaka elitshumi kusiyaphezulu.
Uthi odokotela abazakwenza lumsebenzi kabasoze behlawulise muntu ngoba bezelemithi yonke edingakalayo kusukela Mhlaka 4 Nkwenkwezi.
UMqondisi wezempilakahle koBulawayo, uDokotela Maphios Siamuchembu, uchasisa isimo sokudabuka komlomo laphakathi kwawo ese Cleft.
"Umuntu ole Cleft Lip uyabe elendebe elesikhala, kuthi oleCleft Palate uyabe elesikhala ngaphakaathi kwephezulu yomlomo. Umuntu uzalwa enjalo uyabe engakhulanga kahle esasesiswini sikanina njalo lokhu akuvamanga."
Uqhubekele phambili esithi ukwelatshwa kwesimo lesi yikuhlinza umuntu isikhala sivaleke.
"Indlela yokwelapha iCleft Lip kumbe iCleft Palate yikuhlinzwa isikhala sivalwe. KoBulawayo asilabo odokotela abalolwazi lokuhlinza isimo lesi isikhathi esinengi sibalabo uma bevela eHarare kumbe kwamanye amazwe. Kunsuku ezilandelayo siyabe silabo eMpilo Hospital beselapha kungelanhlawulo."
lnengi labazali abalabantwana abalesimo sokudabuka indebe laphakathi komlomo abenelisi ukuhlawulela ukuhlinzwa kwabantwababo. Omunye umzali olontwana olesimo lesi nguNkosikazi Nompilo Nyathi.
"Umntanami ngimzalele khonapha eMpilo eleCleft Lip bangithembisa ukuthi basamhlinza engaba lenyanga eziyisithupha kodwa ngalesosikhathi angisenelisanga ngasuka ngabambeka sengilhangelele ukuthi ahlinzwe kunyanga ezayo."
UNkosikazi Silobuntu Mpofu laye uthi ulomntwana odlanzima ngenxa yesimo lesi.
"Umntanami namzala ngo2011, ngamzalela eTsholotsho eleCleft Lip leCleft Palate sewahlinzwa indebe sekusele ingaphakathi yomlomo."
Omunye njalo umzali olomntwana owazalwa elalesi simo nguNkosikazi Charity Mudimba.
"Umntanami ngamzalela khonapha eMpilo elesimo seCleft Lip leCleft Palate njalo ngikhangelele ukuthi ahlinzwe. Udubo olukhona yikuthi kadlu kuhle."
lsimo sabantwana abazalwa bedabuke indebe laphakathi komlomo kasivamanga. Odokotela bathi lokhu kudalwa yikungakhuli kahle komntwana esiswini sikanini. Kulungiswa ngokuthunga lapho okudabuke khona. Abezimpilakahle bathi bayasilela odokotela eZimbabwe abazi ukulungisa isimo lesi.
Kungalesi sizatho abenhlanganiso le bekhetha ukuzophathisa abaswelayo abalabantwana abalesimo esinje. Kubiza inkulungwane ezintathu zamadollar eMelika – US$3,000 ukuhlinza lokulungisisa isimo lesi eseCleft lip le cleft palate.
Abenhlanganiso yeOperation of Hope, ebunjwa ngodokotela abadabuka emazweni anjenge Bhilithani, India lamanye ivame ukuba lenhlelo zokwethekelela kweleZimbabwe kanye ngomnyaka kumbe kabili besiyaphathisa abantwana labadala abazalwa belesimo lesi. Baqhuba umsebenzi ofanayo kwele Zambia, Malawi lakwamanye amazwe.
Forum