Kulokuphikisana kwemibono kukhomidi yephalamende ebona ngokulotshwa kwesisekelo sombuso esitsha kulandela imibiko eyethulwe ngomunye wabagcinisihlalo bayo uMnumzana Paul Mangwana owebandla leZANU PF.
UMangwana uthi abenhlanganiso ezizimeleyo abahlolisisisa uhlelo lokuthathwa kwemibono kazulu ekulotshweni kwesisekelo sombuso kumele babotshwe. Omunye wabagcinisihlalo balikhomi uMnumzana Edward Mkhosi uthi ikhomidi yakhe izamele ikhulumisane ivumelane ekuthini inhlanganiso ezizimeleyo kumele zisebenze njani.
Kodwa omunye njalo wabagcinisihlalo abathathu laba uMnumzana Douglas Mwonzora utshele lumsakazo ukuthi abenhlanganiso ezizimeleyo abafuna ukuhlolisisa ukuqhubeka kohlelo lokuthapha imibono kazulu kumele banikwe imvumo yikhomidi le kuqala.
Kunsuku ezedluleyo ikhomidi le ikhonone kakhulu ngendlela abenhlanganiso ezizimeyo lezi abaqhuba ngayo umsebenzi, yakhuthaza ukuthi baziveze uma befika lapho okulemihlangano khona, hatshi ukuzifihla.
Inhlanganiso ezizimeleyo ezigoqela iZimbabwe lLawyers for Human Rights, Zimbabwe Election Support Network kanye leZimbabwe Peace Project zithumele amalunga azo ezigabeni zonke zelizwe ukuyahlolisisa uhlelo lokuthathwa kwemibono kazulu.
Kunsuku ezedluleyo inhlanganiso lezi zethule imibiko yokuthi uhlelo lolu aluqhutshwa kuhle, imibiko elandulwe yikhomidi yephalamende eqhuba loluhlelo.
UBrenda Moyo weStudio 7 ukhulume lomunye wabagcinisihlalo bekhomidi yephalamende,uMnumzana Edward Mkhosi oqonqosela ukuthi abafuna ukuhlola uhlelo lokuthathwa kwemibono kazulu bakhululekile ukwenza lokhu kodwa kumele balandele iziqondiso ezithize.
