Ukwethulwa kwemali entsha eyeZimbabwe Gold kumbe ZiG kubikwa sekuphazamise ukuthengiselana elizweni.
Abamabhanga bazise ngempelaviki ukuthi sebemise ukusetshenziswa kwemali yamaRTGS besalungisisa imitshina yabo ukuze baqale ukusebenzisa iZiG kodwa amanye amabhanga aseqalile ukuyisebenzisa agoqela iEcocash.
Abezitolo, imikambo labathwala uzulu kubikwa sebesala ukwamukela amaRTGS besamukela idola leMelika kuphela.
Lokhu kwenzakala kungelani lokuthi ibhanga elikhulu eleReserve Bank of Zimbabwe lazisa ukuthi imali le izaqhubekela phambili isebenza inyanga kaMabasa ize iphele.
Asenelisanga ukuxhumana lomgcinisihlalo wekhomithi yepalamende ebona ngezemali uMnu Clemence Chiduwa, njengoba ebengakaphenduli imibuzo ayithunyelweyo kodwa watshela iStudio7 ngoLwesihlanu ukuba kuzathatha isikhathi ukuthi abantu bamukele limali.
Ingcwethi yezenotho njalo elwela amalungelo abathengi ephansi kwenhlanganiso yeNational Consumer Rights Association uMnu Effie Dlela Ncube, uthe abantu abanengi abasoze bamukele imali yamaZiG njengoba balahlekelwa yimali kanengi ngenxa yokulethwa kwemali ezintsha ezigoqela ama-Bearer Cheque, amabond, amaRTGS lezinye.
Forum