Inhlanganiso yabakumsebenzi wokugaya impuphu eye Grain Millers Association of Zimbabwe bathi ngenxa yokuba uhulumende uthi kasenelisi ukubhadalela esinye isilinganiso sendleko yokuthenga umumbu osokusenza bawuthenge ngentengo ephezulu labo sebezabanjwa ngamandla ukukhuphula intengo yempuphu.
Umbiko owethulwe ngabenhlanganiso yeGrain Millers Association of Zimbabwe-GMAZ, uthi intengo yomgodla wempuphu, olesisindo samamakilogram alitshumi-10kg, ikhangelelwe ukukhuphuka isuka kumadola angamatshumi ayisithupha ZWL60.00 isiya ku madola edlula kancane alikhulu ZWL101.66.
UMnunzana Effort Ncube isiphathamandla senhlanganiso emmela ilungelo labathengi eyeNational Consumer Rights Association iNACORA, uthi ukukhuphulwa kwentengo yempuphu kuzalethela abantu ubunzima obukhulu ngakho kuyadingeka ukuthi uHulumende angenele.
“Ukukhwela kwentengo yempuphu kuzaletha usizi olwesabekayo phakathi kwabantu, bephakathi kwendlala engaka nxa izavele ikhwele yona ebikade iphezulu kangaka kuzayenza ukuthi abantu bengenelisi ukuthi bathenge. Kuthi lalezi izinto ezingaka khweli zizakhwela njengoba amafutha ezimota ekhwelile lawo. Lokhu kutsho ukuthi yonke into ethwalwa ngezimota sizakhwela, impilo izakuba nzima emalangeni alandelayo ngoba kuzabe kungasadliwa ngekhaya, yinto okufanele iphele leyo, uHulumende akulungisise.”
Unkosikazi Siphiwe Sithole ongumbalisi koBulawayo uthi inyathelo elithethwe nguHulumende aliqondanga elokuma ukubhadala esinye isilinganiso sendleko yokuthenga umumbu.
“Kambe nxa uHulumende ezakhikha isubsidie yomumbu uthi abantu baphile njani mhlawumbe ngabe ubekwenze abantu sebevunile bekuzabe sekungcono ngoba okwakhathesi abantu ngitsho labasemakhaya bayathenga imumbu.Kambe kuzadliwani kuzathiwani, sibona engani inyathelo leli elithethwe nguHulumende aliqondanga kumele akuhlolisise abuye ayibisele isubsidie leyo.Nxa kambe i10kg izakuba yi$101 kuzabe sekunzima kakhulu kutsho kuzakudla abalemali lakho langaze ube usebenza imali yakhona ayeneli.”
Unkosikazi Angela Masuku oyisakhamuzi sako Bulawayo uthi uyazibuza ukuthi sokuyimpi na, yokukhuphulwa kwentengo yempahla emqoka.
“Sokungamadlwane yini mina ngilabantwana labazukulu impuphu vele i10kg siyidla 4days. Akeni lingitshele ukuthi amahundred lawa siyawathola ngaphi, lamabhonasi lawa ebesiwafakelwe sehle aphela akusela lutho. Hayi Hulumende bakithi sicela lingenele, kanti lapha sekubulawana kuhamba njani vele.”
Kusenjalo intengo yamafutha ezimota layo ivuke ikhuphukile ngoMvulo. Umnunzana David Ndlovu ongumtshayeli womtshova uthi ibhizimusi isisiwa ngoba abantu babalekela emabhasini.
“Thina ngapha esitshovayo kubanzima kithi ngendaba ye fuel leyi ekhwela everyday. Kusuka kubenzima sicina singasakwazi ukuthi senzenjani, lebhizimusi yethu iyayehla ngoba labantu bacina bebaleka bengasagadi lemitshova sebesiya emabhasini.Thina ngapha emitshoveni sizehluleka sicine sihlala phansi, l bhizimusi izakuwa ngoba ifuel leyi ngendlela ekhwele ngayo ngeke silunge.”
Uhulumende uvele wazisa ngaleli nyathelo ngesikhathi esethula indleko yesikhwama selizwe, iBudget ukuthi uzakuma ukubhadalela isilinganiso esithile sendleko yomumbu, akade esibhadalela phansi kohlelo lwamasubsidies, kodwa lokhu bekukhangelelwe ukuthi kuzakwenziwa ekuqaliseni komnyaka ozayo.
