Abenhlanganiso yabagaya impuphu elizweni eyeGrain Millers Association of Zimbabwe baqale uhlelo lwabo lokutholisa amavinkili akoBulawayo impuphu, ngentengo ephansi.
Isaka lempuphu elilesisindo samakilogram alitshumi ithengiswa ngamadola angamatshumi ayisikhombisa.
Loluhlelo kodwa lutshiya phandle izakhamizi zemaphandleni eziyizo ezibhekane lendlala enkulu ukudlula abantu abahlala emadolobheni.
UNkosikazi Nomusa Khumalo oyakhele eSeshanke eNkayi kuWard 3 uthi sebehlaselwe yiCorona lendlala sikhathi sinye.
''Yebo siyezwa ngalo umkhuhlane weCorona kodwa thina sesihlaselwe yindlala leCorona intengo yokudla emavinkilini isiqanse kakhulu sicela uhulumende angenele ancedise abantu ngokudla ngoba abantu sebengabulawa yindlala bengakabulawa yicorona''
UMnu Mtshayeli Mdlongwa weFelabusi uthi bathwele nzima bacela uhulumende angenele.
''Indaba yeCorona siyayizwa kodwa sesithwelenzima lapha eFilabusi izulu alini, besiphila ngokugebha abezomvikela sebetshona emagodini impuphu ayisathengeki sekunzima ukuthi siphile sicela uhulumende angenele asiphe umumbu kodwa lokho ngoba lapha akusaphileki lokhe kube lelockdown.''
Okugcizelelwe yisakhamuzi seGwanda, uMnu Ndodana Moyo.
''Izakhamizi zisengozini lokhe kubelelockdown akulampuphu kumbe ukudla osekuthe kwafika ebanwtini intenge yemphuphu iphezulu kakhulu sicela uhulumende angenele atholise abantu ukudla emakhay ngoba indla isibulele abantu.''
Isakhamuzi sakoBulawayo, uMnu Mqondisi Ndebele uthi laloba impuphu ibuya abezomvikela yibo abathola ithuba lokuqala lokuthenga.
''Into emangalisayo yikuthi siyathi silayinele ukuthenga phandle ubona abezomvikela bekhupha amacard abo bethenga thina simile sicela uhulumende abelendlela yokuthi abantu bathenge kuhle hatshi ukuthi abantu batshone belayinile.''
Kodwa Umongameli Emmerson Mnangawa uhlala ekhuluma ukuthi umthwalo wokuvimba ukusabalala kweCoronavirus kumele ubambisanwe phakathi kwabantu bonke kunhlangothi zonke zempilo. Kungokunjalo inhlanganiso yabagaya impuphu eyeGMAZ iphe uhulumende uncedo lomumbu.
Ukuthengiswa kwempuphu ngentengo ephansi kukhangelelwe ukugqitshwa ngemva kweziqinti ezinhlanu NgeNsonto.
Inhlanganiso ebona ngezoncedo lokudla emhlabeni jikelele eyeWorld Food Programme yethule imibiko ethi idinga izigidi ezilikhulu lamatshumi amathathu amadola eMelika-USD$130million yokuthengela abantu beZimbabwe ukudla abedlula izigidi eziyisikhombisa-7,7millionababhekane lendlala embi. I_WFP ithi kuyakuthi kusiyaphela umnyaka Mpalakazi kuyabe kuzafunakala izigidi ezingamakhulu phose amahlanu amadola-USD$472million ngoba izulu lingananga kuhle lonyaka nanku sokuphinde kwaba lodubo lokuqhamuka komkhuhlane weCOVID-19.
lZimbabwe ingene kuviki yesithathu yohlelo lweziqondiso zikahulumende zokuthi abantu bahlale emakhaya benganyakazeli ndawana yonke, ukuze kuvinjwe ukumemetheka lokuthelelanwa komkhuhlane weCOVID-19 osubulele abantu abambalwa emhlabeni jikelele.
EZimbabwe, lumkhuhlane usuthethe imiphefumulo yabantu besilisa abathathu kuthi abalitshumi lathobaminwemibili kusiyatshona izolo bebebikwa sebelegcikwane, lobanje eMaNdebeleni kungela sibhedlea esilakho ukonga abantu abayabe sebegula lumkhuhlane.
KoBulawayo kulabantu abane asebefunyenwe belegcikwane leCovid 19, oyedwa wabo ubikwa engowesifazane osebenza kwesinye sezibhedlela zalelidolobho kodwa uhlaliswe yedwa emzini wakhe kuquarantine.