Ibandla leMDC-T elikhokhelwa nguMnu Douglas Mwonzora lithi selivumele oxotshwe kusikhundla sokuba ngumqoqi wenhlelo zalelibandla uMnu Abednico Bhebhe loNkosikazi Docas Sibanda ukuthi baphenduke kulelibandla.
UBhebhe uxotshwe phambilini komhlangano weCongress ngoMpalakazi lapho lelibandla elikhethe khona uMwonzora ukuthi alikhokhele.
Kodwa uBhebhe utshele iStudio 7 ukuthi kazange acele ukubuyela kulelibandla njalo kafuni vele ukuba lilunga lalo.
I-MDC-T iguqule njalo isisekelo sayo ngempelaviki yavumela uMnu Elias Mudzuri ukuthi abe ngumsekeli kaMwonzora wesibili ngemva kukaNkosazana Thokozani Khupe, yena othi kamukeli ubukhokheli bukaMwonzora.
Isikhulumeli salelibandla uMnu Witness Dube utshele umsakazo weStudio 7 ukuthi lanxa uBhebhe elandula ukuthi ucele ukubuyiselwa kubandla, uMwonzora umtshele ukuthi lokho kwenzakele.
